Numri i vizitorëve në Kosovë gjatë vitit 2025 ka shënuar rritje krahasuar me një vit më parë (2024), bëjnë të ditur të dhënat e Agjencisë së Statistikave të Kosovës (ASK). Sipas hulumtimit për hotelerinë dhe turizmin, gjatë vitit 2025 janë regjistruar gjithsej 762 mijë e 836 vizitorë vendorë dhe të huaj. Prej tyre, 39.3 për qind ishin vizitorë vendorë, ndërsa 60.7 për qind të huaj, përcjell KosovaPress. Numri i përgjithshëm i net-qëndrimeve arriti në 1 milion e 653 mijë e 390. Nga ky total, 45.4 për qind u realizuan nga vizitorët vendorë dhe 54.6 për qind nga të huajt. ASK-ja njofton se numri i vizitorëve vendorë është rritur për 9.1 për qind krahasuar me vitin 2024, ndërsa net-qëndrimet e tyre janë shtuar për 8 për qind. Numri më i madh i turistëve të huaj ishte nga Shqipëria, Gjermania, Zvicra dhe Turqia Rritje është evidentuar edhe te vizitorët e huaj. Gjatë vitit 2025, numri i tyre u rrit për 9.4 për qind në raport me vitin paraprak, duke arritur në 463 mijë e 92 persona. Numri më i madh i turistëve të huaj ishte nga Shqipëria, Gjermania, Zvicra dhe Turqia. Të dhënat tregojnë gjithashtu se gjatë vitit 2025, 639 mijë e 945 banorë të Kosovës kanë realizuar të paktën një udhëtim me net-qëndrim brenda ose jashtë vendit. Ndërkaq, sipas statistikave të mbledhura në pikat kufitare, gjatë periudhës janar-dhjetor 2025 në territorin e Republikës së Kosovës janë regjistruar 7 milionë e 465 mijë e 625 hyrje të shtetasve të huaj.