Një rezervuar uji, që ishte vendosur brenda Kalasë së Prizrenit, qysh në vitin 1939, do të zhvendoset nga këtu, së shpejti.

Për këtë u nënshkrua një marrëveshje tripalëshe ndërmjet Ministrisë së Kulturës dhe Turizmit, Ministrisë së Ekonomisë dhe KRU “Hidroregjioni Jugor”.

Të njëjtat do të jenë edhe bashkëfinancuese të projektit “Dislokimi i rezervuarit të Kalasë së Prizrenit”, i cili sipas një njoftimit të ministrisë së Kulturës, synon mbrojtjen dhe ruajtjen afatgjate të një prej monumenteve më të rëndësishme të trashëgimisë kulturore të Kosovës.

Rezervuari ekzistues, i cili ndodhet brenda hapësirës së Kalasë që nga viti 1939, sipas institucioneve ka shkaktuar rrjedhje të vazhdueshme të ujit ndër vite, duke dëmtuar strukturat e monumentit dhe duke rrezikuar sigurinë e vizitorëve.

“Përmes këtij intervenimi të domosdoshëm, institucionet po ndërmarrin një hap të rëndësishëm në mbrojtjen, konservimin dhe valorizimin e Kalasë së Prizrenit, si një nga asetet më të çmuara historike, kulturore dhe turistike të vendit”, thuhet në njoftim, transmeton KosovaPress.

Vlera totale e investimit në këtë projekt do të jetë 450 mijë euro. /KosovaPress/