Profesori i shkencave të sigurisë, Avni Islami thotë se Serbia në vazhdimësi tenton t’i shtrembërojë faktet dhe provat të cilat dëshmojnë për kryerjen e gjenocidit të cilin forcat dhe paramilitarët serbë e kryen në Reçak. Ai për KosovaPress thekson se jo më larg se vitin e kaluar u arrestuan dy shqiptarë të cilët ishin përpjekur që të fabrikojnë prova të rrejshme për këtë masakër. Islami tha se masakra e Reçakut ishte thirrje dhe ndërgjegjësim për bashkësinë ndërkombëtare për krimet që po kryheshin në Kosovë gjatë luftës së viteve 1998-99. Në viti 2024 janë arrestuar dy persona,  Bedri Shabani e Muharrem Qerimi, të cilët dyshohet se kanë bashkëpunuar me BIA-n serbe. KosovaPress kishte mësuar se arrestimi i tyre ishte bërë i mundur pas zbulimit nga Agjencia Kosovare e Inteligjencës. Një ditë pas arrestimit të tyre, Policia e Kosovës kishte kryer bastisje në pronat e dy të dyshuarve ku në cilësi të provave materiale janë gjetur dhe sekuestruar dokumente të ndryshme, kompjuter, telefona, USB, DVR, kaseta, armë dhe municione, maska dhe gazmaska ushtarake. “Kemi rastin e angazhimit të dy agjentëve shqiptarë me një të BIA-së, të cilët përpiqen të fabrikojnë prova të rrejshme kinse masakrën e Reçakut e kanë kryer Ushtria Çlirimtare e Kosovës, dhe fatbardhësisht nuk u arrit qëllimi duke iu falënderuar AKI-së e cila arriti t’i demaskoj këta dy agjentë. Pra, në vend që të kërkojnë falje për krimet, ata përpiqen që t’i shtrembërojë ato prova jo vetëm , por gjatë gjithë kohës kur tashmë i kemi krerët e UÇK në Hagë përpiqen që të fabrikojnë prova të rrejshme për ta denigruar UÇK-në”, thotë ai. Islami thotë se provat janë të pakontestueshme dhe tregojnë se Serbia vrau në Reçak 45 shqiptarë të paarmatosur. Në 26-vjetorin e kësaj masakre, në Kompleksin Memorial në Reçak bënë homazhe numër i madh i qytetarëve si dhe figura politike. Krerët shtetërorë të Kosovës kërkuan drejtësi për viktimat e masakrës së Reçakut. Në akademinë përkujtimore u theksua nevoja që gjykimi dhe ndëshkimi kriminelëve që vranë 45 civilë të pafajshëm në Reçak të ndodh, qoftë edhe në mungesë të tyre. Më 15 janar 1999, në fshatin Reçak u vranë e u masakruan barbarisht 45 shqiptarë të paarmatosur. Ish-shefi i misionit vëzhgues të OSBE-së në Kosovë, ambasadori William Walker, e pati cilësuar masakrën e Reçakut si krim kundër njerëzimit. Intervista e plotë në sistemin me parapagim...