Koreja e Jugut e ka nisur me fitore aventurën në Kampionatin Botëror 2026, duke mposhtur Çekinë me rezultat 2:1 në ndeshjen e Grupit A të zhvilluar në Guadalajara. Azatikët arritën të përmbysin disavantazhin e pjesës së dytë dhe të sigurojnë tri pikë të rëndësishme në start të turneut. Pas një pjese të parë pa gola, çekët kaluan në epërsi në minutën e 59-të me kapitenin Ladislav Krejci, i cili realizoi me kokë pas një aksioni nga ndërprerja. Megjithatë, avantazhi i tyre zgjati vetëm tetë minuta, pasi Hwang In-beom barazoi shifrat në 1:1 me një goditje të saktë. Koreja e Jugut vazhdoi presionin dhe në minutën e 80-të gjeti golin e fitores. Hwang In-beom këtë herë u shndërrua në asistues, ndërsa Oh Hyeon-gyu shënoi për 2:1, duke vulosur përmbysjen e ekipit të drejtuar nga Hong Myung-bo. Me këtë sukses, Koreja e Jugut merr kryesimin e përkohshëm në garën për kualifikim nga Grupi A dhe regjistron fitoren e parë në një ndeshje hapëse të Botërorit që nga viti 2010. Çekia, e rikthyer në Kupën e Botës pas dy dekadash mungesë, mbetet pa pikë pas xhiros së parë. KosovaPress