Vetëm disa ditë para ndeshjes së tyre hapëse të Kupës së Botës kundër Skocisë këtë fundjavë, Haiti është udhëzuar nga organi qeverisës i futbollit botëror të ndryshojë dizajnin e uniformës.

Dizajni i fanellës së Haitit, që përshkruan një skenë lufte, nuk përputhet me rregullat e FIFA-s dhe në fakt është ndaluar.

Fanella përmban një ilustrim të Betejës së Vertieres në 1803, e cila siguroi pavarësinë e Haitit, me flamurin e vendit. Fanella u vesh në të dy miqësoret e Haitit për ngrohjen e Kupës së Botës kundër Zelandës së Re dhe Perusë.

Rregulloret e pajisjeve të FIFA-s ndalojnë përdorimin e çdo mesazhi ose slogani politik, fetar ose personal, në uniformë.

Prodhuesi kolumbian, Saeta, theksoi në një deklaratë se dizajni i tij origjinal ishte një homazh për burrat dhe gratë që kontribuojnë çdo ditë në të ardhmen e Haitit dhe nuk ishte menduar si një deklaratë politike.

“FIFA vendosi që disa elementë vizualë mund të interpretoheshin ndryshe sipas rregulloreve të saj të pajisjeve dhe në fund kërkoi modifikime në dizajn. Ndërsa ky interpretim ndryshonte nga qëllimi ynë, Saeta respektoi procesin dhe zbatoi kërkesat përfundimtare të komunikuara nga FIFA”, u tha në deklaratë.

Haiti, që garon në Kupën e Botës pas 52 vitesh, përballet me Brazilin dhe Marokun në dy ndeshjet e tjera të Grupit C.

KosovaPress