Komisioni për Çështje të Sigurisë dhe Mbrojtjes ka miratuar vendimin e qeverisë për dërgimin e Forcës së Sigurisë së Kosovës jashtë vendit, si pjesë e Forcës Ndërkombëtare Stabilizuese në Gaza. Ky vendim u përkrah nga të gjithë anëtarët e komisionit pa dallime partiake, përveç anëtarit nga Lista Serbe. Megjithatë, nga opozitarët u kërkua që ushtarët e FSK-së që zbarkojnë atje të kenë mbështetjen e plotë në aspektin logjistik, shëndetësor dhe financiar. Kërkesë kjo e cila u tha është zbatuar nga Ministria e Mbrojtjes. Anëtari i komisionit, deputeti i PDK-së, Rrahman Rama, duke shprehur mbështetjen ndaj këtij vendimi, tha se Kosova tani nuk është vetëm konsumuese e sigurisë, por edhe kontribuuese dhe prodhuese e saj. Mbështetje këtij vendimi i ofroi edhe anëtari i komisionit nga radhët e LDK-së, Fadil Hadergjonaj, por shprehu edhe nevojën që ushtarët e FSK-së të kenë mbështetjen e nevojshme nga shteti. Të gjitha këto kërkesa janë zbatuar nga ekzekutivi, sipas deputetit të LVV-së, Enver Dugolli. Krahas kësaj, komisioni diskutoi edhe për vizitën në kampin “Enver Zymberi” të Njësive Speciale të Policisë së Kosovës, për çka u nxit debat mes deputetëve. Në fund, propozimi i deputetes së AAK-së, Albana Bytyqi, për të shkuar në këtë kamp nuk mori mbështetjen e nevojshme. /KosovaPress/