Inspektorati Policor i Kosovës (IPK) ka rekomanduar suspendimin e tre punonjësve të Policisë së Kosovës nën dyshimet për veprën penale keqtrajtimi gjatë ushtrimit të detyrës zyrtare ose autorizimeve publike. Informacionet e para lidhur me këtë rast IPK-ja i ka pranuar nga Policia e Kosovës dhe pas veprimeve fillestare hetimore dyshohet se dy zyrtarë policorë nga njësia e trafikut të kryeqytetit dhe një zyrtar tjetër i Stacionit Policor Jugu në Prishtinë kanë tejkaluar autorizimet e tyre të përdorimit të forcës. Incidenti raportohet të ketë ndodhur në mbrëmjen e datës 11 nëntor 2024 në Fushë Kosovë, me rastin e një ndalimi në trafik të një qytetari nga zyrtarët policorë. Hetuesit e IPK-së në konsultim dhe koordinim me Prokurorinë Themelore në Prishtinë pritet të ndërmarrin veprime tjera hetimore drejt sqarimit të rrethanave të këtij incidenti.