Rektori i Universitetit të Prishtinës, Arben Hajrullahu ka deklaruar se profesorët e UP-së të cilët nuk respektojnë detyrimet e tyre duhet të jenë në shqetësuar, derisa i ka bërë thirrje studentëve që kanë paralajmëruar protestë që mos të bëhen vegla të këtyre profesorëve. Hajrullahu në një konferencë për media tha se sot është njoftuar se studentët kanë lëshuar komisionin ad-hok dhe kanë njoftuar protestë për ditën e marte, derisa i ka bërë thirrje studentëve të UP-së që mos të bien pre e de informatave dhe lajmeve të rreme. Ai ka paraqitur disa të arriturat në më pak se 6 javë të tij në krye të UP-së, ku përmendi kontributin e tyre në deklaratën e përbashkët për shkencën që është miratuar në kuadër të procesit të Berlinit, pastaj inaugurimin e qendrës për arkeologjinë, marrëveshjen me Japoninë për hapjen e këndit të librave japoneze, avancimin e fondet e MCC, ku do të investohen më shumë se 7-8 milionë dollarë në UP, por edhe çështje tjera. “Jo vetëm protestat por edhe luftërat kur ndodhin, ato përfundojnë në fund me një marrëveshje. Në rrugë çështjet nuk zgjidhen. Unë sot sapo takova student të Universitetit të Prishtinës, përfaqësues e Parlamentit Studentor dhe i garantova që ata do të jenë prioriteti, pa student ne nuk kemi universitet, nuk janë studentët targeti, nuk janë caku që të godite, mirëpo, siç duket, edhe pse një numër shumë i vogël i punonjësve të UP-së që kanë arrit për vite e për dekada me keqpërdorë  dhe me i zhvat fondet publike, duke mos përmbushur detyrat e tyre si profesorë, e duke mos i vlerësuar studentët në mënyrë të vazhdueshme, siç duket janë të shqetësuar. Po ashtu, çarqet e caktuara në këtë universitet duhet të jenë edhe më të shqetësuara kur shohin se paligjshëmritë do të caktohen në kanalet e duhura, andaj janë burime të përhapjes së lajmeve të rreme duke tentuar që me i keqpërdorë studentëve për të dal në protesta dhe rrugë, kinëse po i mohohen të drejtat studentëve. Ne kemi një statut të ri dhe na obligon të sillemi në konformë kornizave ligjore të cilat janë”, tha ai, duke shtuar se profesorët e UP-së, e kanë obligim të bëjnë vlerësimin e studentëve në mënyrë të vazhdueshëm, e që për fat të keq nuk ndodh në të gjitha rastet. “Studentët i garantoj me fjalë publike që pa përjashtim do t’i ndërmarrë të gjitha masat që profesorët, së pari t’i përmbushin obligimet e veta kontraktuale. E di që numri më i madh i profesorëve dhe profesoreshave janë të ndershëm, punëtorë që shpeshherë arrin rezultate të jashtëzakonshme”, tha ai. Sipas tij, është një pakicë që ka arrit të përhap lajme të rreme kinëse menaxhmenti i UP-së është kundër studentëve. Ai shtoi se kanë një sistem elektronik për të përcjellë të arriturat e studentëve por atë që e ka gjetur, është se ky sistem nuk është përdorur nga grupi i dembeleve, gjë që theksoi se nuk do ta lejojë këtë nga situatë me të cilët i kanë futur studentët në “gërshërë”. Përndryshe, janë rreth 27 mijë studentë në Universitetin e Prishtinës.