Si prindër, ne udhëheqim me shembull. Por shumë shpesh, zakone të gabuara prindërimi mund t’i çojnë fëmijët në drejtim të gabuar. Shumica e njerëzve bien dakord që fëmijët kanë nevojë për inkurajim, mbështetje, pavarësi dhe përvoja reale.

Ja 5 gabime që duhen shmangur nëse doni që fëmija juaj të rritet si një lider i suksesshëm.

Prindërimi mbikontrollues (helicopter parenting)

Termi “prind helikopter” i referohet prindërve që përfshihen në mënyrë të tepruar në jetën e fëmijës, duke e kontrolluar, mbrojtur dhe perfeksionuar gjithçka. Psikologia Ann Dunnewold shpjegon se kjo është një formë e tepruar e prindërimit të përgjegjshëm. Edhe pse prindërit nuk duan që fëmijët të lëndohen, mbrojtja e tepërt i privon ata nga përvoja të rëndësishme mësimi.

Nëse fëmija nuk përjeton asnjë vështirësi, ai nuk mëson si t’i përballojë ato. Fëmijët e mbrojtur tepër shpesh rriten më të pasigurt, më të shqetësuar dhe më pak të hapur ndaj ideve të reja.

Lavdërimi i tepruar

Psikologu Dr. Paul Donahue paralajmëron se lavdërimi i tepërt mund të dëmtojë zhvillimin e fëmijës. Kur një fëmijë lavdërohet për gjithçka, ai mund të fillojë të besojë se duhet të jetë gjithmonë perfekt dhe të ketë gjithmonë aprovimin e të tjerëve.

Në vend të lavdërimeve të përgjithshme si “shumë mirë”, rekomandohet të vlerësohet përpjekja konkrete, p.sh. “ke punuar shumë për këtë”.

Ngatërrimi i rritjes fizike me pjekurinë mendore

Fëmijët kalojnë në faza të ndryshme zhvillimi, nga fëmijëria e hershme deri në adoleshencë. Një fëmijë mund të duket më i madh në moshë, por kjo nuk do të thotë se është emocionalisht gati për përgjegjësi të mëdha.

Këto 5 histori dëshmojnë se dashuria e vërtetë fshihet te gjestet e vogla...

Për shembull, një 9-vjeçar që duket më i rritur nuk është domosdoshmërisht gati të kujdeset për një fëmijë më të vogël. Prindërit nuk duhet të bazohen në pamje apo sjellje sipërfaqësore për të vlerësuar pjekurinë.

Dorëzimi ndaj kërkesave të fëmijës

Fëmijët testojnë kufijtë e tyre natyrshëm. Por nëse prindërit dorëzohen gjithmonë, fëmija mëson se mund të marrë gjithçka me këmbëngulje ose zemërim, transmeton Oranews, përcjell KosovaPress.

Vendosja e kufijve dhe qëndrueshmëria janë shumë të rëndësishme. Nëse prindi nuk i mban rregullat, fëmija mund të rritet me idenë se gjithçka është e negociueshme dhe se nuk ka pasoja.

Mungesa e integritetit në sjellje

Sjellja e prindërve është modeli kryesor për fëmijët. Nëse prindi shan, gënjen, nuk mban premtimet ose sillet ndryshe në mungesë të të tjerëve, fëmija e mëson këtë si sjellje normale.

Një lider pa integritet nuk është një lider i mirë. Prandaj, mënyra si sillet prindi ka ndikim të drejtpërdrejtë në karakterin e fëmijës.