Komandani i KFOR-it, Ozkan Ulutash (Özkan Ulutaş) ka thënë se siguria e qëndrueshme në Kosovë në fund të fundit varet nga një zgjidhje politike.

Ai e ka bërë këtë koment në një intervistë për mediet serbe në Beograd, të cilën ua ka shpërndarë medieve në Kosovë, të shtunën.

“KFOR vazhdon të përmbushë mandatin e tij të kahershëm të Kombeve të Bashkuara, duke kontribuar për një mjedis të sigurt për të gjithë njerëzit që jetojnë në Kosovë, në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX), në rolet e tyre përkatëse si reagues ndaj sigurisë”, ka thënë Ulutash, përcjellë KosovaPress. “...Megjithatë, siguria e qëndrueshme në Kosovë në fund të fundit varet nga një zgjidhje politike”.

Për këtë arsye, sipas Ulutash, KFOR vazhdon të mbështesë plotësisht dialogun e ndërmjetësuar nga BE-ja për normalizimin e marrëdhënieve ndërmjet Beogradit dhe Prishtinës.

“Ky është kuadri për të gjetur zgjidhje për çështjet e mbetura pezull, duke respektuar të drejtat e të gjitha komuniteteve”, ka thënë ai.

Intervistën/deklaratën që Ulutash e dha në Beograd, të premten, e të cilën KFOR ua nisi medieve kosovare, të shtunën, mund ta lexoni të plotë më poshtë:

Deklatarë e komandantit të KFOR-it

PËR MEDIAT SERBE

Beograd, 13 mars 2026

1.
Situata e sigurisë në Kosovë aktualisht është e qetë dhe së fundmi nuk kam vërejtur ndryshime të rëndësishme në këtë drejtim. Natyrisht, situata mbetet gjithashtu e brishtë, si pasojë e çështjeve që ende nuk janë zgjidhur. Mandati im i parë filloi menjëherë pas incidenteve serioze të sigurisë në veri të Kosovës dhe rritjes së pranisë së KFOR-it në terren. Nuk kemi parë përsëritje të të njëjtit nivel dhune. Megjithatë, ne presim që ata që janë përgjegjës për një dhunë të tillë të pajustifikuar të mbahen përgjegjës.

Ndërkohë, KFOR vazhdon të përmbushë mandatin e tij të kahershëm të Kombeve të Bashkuara, duke kontribuar për një mjedis të sigurt për të gjithë njerëzit që jetojnë në Kosovë, në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX), në rolet e tyre përkatëse si reagues ndaj sigurisë.

Kështu, KFOR vazhdon të kryejë misionin e tij. Megjithatë, siguria e qëndrueshme në Kosovë në fund të fundit varet nga një zgjidhje politike. Për këtë arsye ne vazhdojmë të mbështesim plotësisht dialogun e ndërmjetësuar nga BE-ja për normalizimin e marrëdhënieve ndërmjet Beogradit dhe Prishtinës. Ky është kuadri për të gjetur zgjidhje për çështjet e mbetura pezull, duke respektuar të drejtat e të gjitha komuniteteve.

2.
Aktualisht, situata e sigurisë në veri të Kosovës është e qetë.
Ne jemi vigjilentë dhe mbajmë një prani të dukshme dhe fleksibile përmes angazhimeve të rregullta me të gjitha komunitetet lokale dhe patrullimeve, përfshirë patrullimet e sinkronizuara me Forcat e Armatosura të Serbisë në të dy anët e Vijës Administrative Kufitare (ABL).

Gjithashtu jam në kontakt të rregullt me Shefin e Shtabit të Forcave të Armatosura të Serbisë, gjeneralin Mojsiloviq, me të cilin kam zhvilluar bashkëpunim shumë të mirë. Kjo ndihmon në ruajtjen e transparencës për aktivitetet tona përkatëse dhe në reagimin efektiv ndaj zhvillimeve të papritura që mund të ndikojnë në sigurinë lokale dhe stabilitetin rajonal.

3.
Vlera e shtuar e KFOR-it është trefishtë: kemi një prani të dukshme, fleksibile dhe të përshtatshme në gjithë Kosovën; kemi një qasje të paanshme duke kontribuar për një mjedis të sigurt për të gjithë; dhe vazhdojmë të ofrojmë hapësirë për dialog politik.

Mandati i KFOR-it bazohet në Rezolutën 1244 të Këshillit të Sigurimit të OKB-së dhe nuk ka një afat përfundimtar. Çdo vendim për të ardhmen e KFOR-it i takon Këshillit të Atlantikut të Veriut, organi vendimmarrës i NATO-s.

KFOR do të vazhdojë të përshtatet sipas nevojës dhe do të mbetet pjesë thelbësore e përpjekjeve të komunitetit ndërkombëtar për siguri të qëndrueshme në Kosovë.

4.
Me kalimin e kohës, KFOR ka ndërtuar një nivel të mirë bashkëpunimi me Forcat e Armatosura të Serbisë. Kjo është rezultat i kontakteve të rregullta ndërmjet drejtuesve të tyre dhe komandantëve të KFOR-it.

Kam zhvilluar marrëdhënie shumë të mirë pune me gjeneralin Mojsiloviq dhe pres që ky bashkëpunim të vazhdojë, pasi ndihmon në ruajtjen e stabilitetit rajonal.

5.
Që nga viti 2016, Ekipi Këshillues dhe Ndërlidhës i NATO-s – i ndarë nga KFOR-i – ka mbështetur zhvillimin e Forcës së Sigurisë së Kosovës (FSK) në mandatin e saj fillestar për mbrojtje civile përmes ndërtimit të kapaciteteve, edukimit dhe koordinimit të trajnimeve.

Kjo mbështetje mbetet e pandryshuar dhe është e kufizuar në mandatin fillestar të mbrojtjes civile.

6.
KFOR është i përkushtuar për të siguruar një mjedis të sigurt për të gjithë njerëzit që jetojnë në Kosovë, në përputhje me mandatin e tij të OKB-së, në çdo kohë dhe në mënyrë të paanshme. Prania jonë është në dobi të të gjithëve. Ne inkurajojmë të gjitha palët të angazhohen në dialog konstruktiv dhe të punojnë drejt pajtimit.

7.
KFOR vazhdon të përmbushë mandatin e tij të OKB-së në mënyrë të paanshme. Iniciativa e përmendur është një marrëveshje trepalëshe ndërmjet Shqipërisë, Kroacisë dhe institucioneve në Kosovë. NATO nuk është palë në të dhe nuk ka pasur rol në procesin e konsultimit.

Anëtarësimi në NATO nuk i pengon aleatët të lidhin marrëveshje shtesë bashkëpunimi. Mirëpresim angazhimin e vazhdueshëm të Shqipërisë dhe Kroacisë në mbështetje të KFOR-it.

8.
Siç kam thënë që nga dita e parë e mandatit tim, zgjidhja është politike dhe jo ushtarake. Stabiliteti afatgjatë mund të arrihet vetëm përmes dialogut politik të vazhdueshëm, kompromisit dhe zbatimit të plotë të marrëveshjeve.

NATO mbështet plotësisht dialogun e ndërmjetësuar nga BE-ja ndërmjet Beogradit dhe Prishtinës.

9.
KFOR mban një prani të fuqishme përgjatë Vijës Administrative Kufitare dhe kryen patrullime të rregullta për të siguruar një mjedis të sigurt për të gjitha komunitetet.

10.
Forca dhe qëndrimi operacional i KFOR-it rishikohen periodikisht. Aktualisht nuk ka ndryshime të rëndësishme në shqyrtim.

Shtetet e Bashkuara vazhdojnë të luajnë rol kyç për sigurinë në Kosovë dhe stabilitetin rajonal. Rreth 600 trupa amerikane janë të dislokuara në kuadër të KFOR-it.

11.
Mirëpresim njoftimin për një stërvitje NATO–Serbi në Serbi këtë maj. KFOR nuk do të ketë rol formal në të, por kjo aktivitet trajnimi do të ndihmojë stabilitetin në Ballkanin Perëndimor.

12.
Kur themi se situata në Kosovë është e qetë, por e brishtë, nënkuptojmë dy realitete: mjedisi i sigurisë është stabil dhe nuk ka një model të vazhdueshëm dhune, por tensionet politike ende ekzistojnë dhe çdo incident mund të përshkallëzohet nëse nuk menaxhohet me përgjegjësi.

13.
Forca dhe pozicionimi i KFOR-it rishikohen rregullisht për të siguruar që misioni të mbetet efektiv.

14.
KFOR nuk ka mandat për zbatim të ligjit. Megjithatë, aleatët e NATO-s janë të shqetësuar për rritjen e dhunës në Kosovë në vitin 2023 dhe kërkojnë që përgjegjësit të sillen para drejtësisë.

15.
Transformimi i FSK-së ka filluar në vitin 2014 dhe mbështetet nga disa shtete përmes marrëveshjeve bilaterale. Vendimet për prokurime ushtarake janë jashtë mandatit të KFOR-it.

16.
Anëtarësimi në NATO nuk i pengon aleatët të bëjnë marrëveshje shtesë bashkëpunimi ose stërvitje të përbashkëta.

17.
Sundimi i ligjit dhe llogaridhënia për veprimet e së kaluarës janë thelbësore për paqe dhe pajtim të qëndrueshëm.

18.
Ne po i monitorojmë nga afër zhvillimet. NATO mbetet e përkushtuar ndaj parandalimit dhe mbrojtjes kolektive. Siguria e personelit tonë është prioritare.

KFOR vazhdon aktivitetet e tij duke zbatuar mandatin e OKB-së për të kontribuar në një mjedis të sigurt dhe lirinë e lëvizjes për të gjithë njerëzit në Kosovë, në koordinim me Policinë e Kosovës dhe EULEX-in.

/Kosovapress/