SHBA-të nisën një tjetër raund sulmesh ajrore kundër Iranit të shtunën në mbrëmje, duke synuar objektet e tij të mbikëqyrjes bregdetare dhe mbrojtjes ajrore, thanë zyrtarët ushtarakë amerikanë.

Mediat iraniane thanë se një central bërthamor në ndërtim e sipër në qytetin jugperëndimor të Darkhoveyn ishte goditur, si dhe ishulli Qeshm në Ngushticën e Hormuzit.

Centcom tha se shënjestroi gjithashtu Gardën Revolucionare të Iranit (IRGC) përgjegjëse për sulmin që vrau dy trupa amerikane në Jordani të premten, ku një tjetër anëtar i shërbimit mbetet i zhdukur, shktuan BBC, përcjell KosovaPress.

Irani ka kryer sulmet e veta, me zyrtarët kuvajtianë që thanë se një central elektrik dhe uji ishte goditur për herë të dytë brenda dy ditësh. Bahreini tha se mbrojtja ajrore kishte kapur një sulm.

SHBA-të dhe Irani kanë shtuar sulmet kundër njëra-tjetrës ditët e fundit, me të dyja palët të akuzuara për sulm ndaj infrastrukturës kritike.

Uashingtoni ka rivendosur gjithashtu bllokadën e porteve iraniane dhe Teherani ka deklaruar të mbyllur Ngushticën e Hormuzit, pasi armëpushimi i tyre paraprak u shemb më pak se një muaj pasi filloi.

Të dielën, Garda Revolucionare e Iranit (IRGC) tha se dy anije kishin injoruar paralajmërimet iraniane për të mos kaluar nëpër Ngushticën e Hormuzit dhe si pasojë u përfshinë në një "aksident". Ajo paralajmëroi se të gjitha anijet që "ndikohen" nga SHBA-të dhe "përdorin rrugë të pasigurta" "me siguri do të përballen me aksidente".

Gjithashtu të dielën, ambasada amerikane në Aman tha se autoritetet jordaneze kishin evakuuar aeroportin ndërkombëtar dhe portin detar në qytetin jugor të Akabës për shkak të një "kërcënimi specifik dhe të besueshëm".

Megjithatë, një zëdhënës i qeverisë jordaneze e mohoi menjëherë këtë, duke thënë se nuk kishte zbuluar ndonjë kërcënim të kohëve të fundit dhe tha se asnjëri port nuk ishte evakuuar.

Ushtria amerikane tha se nata e tetë radhazi e sulmeve ndaj Iranit ishte “e projektuar për të degraduar më tej aftësinë e Iranit për të kërcënuar anijet tregtare në Ngushticën e Hormuzit” dhe “të ndëshkojë shpejt forcat e Gardës Revolucionare Islamike që nisën sulme kundër anëtarëve të shërbimit amerikan në Jordani mbrëmë”.

Pamjet e verifikuara nga brenda objektit jordanez treguan të paktën dy përplasje dhe një shpërthim.

Duke iu përgjigjur vdekjes së ushtarëve amerikanë, Sekretari i Mbrojtjes Pete Hegseth tha: "Paçin fat, heronj. Sakrifica e tyre vetëm sa e ngurtëson vendosmërinë tonë."

Numri i të vdekurve në SHBA në konflikt është rritur në 16, pasi një pilot i Marinës Amerikane, i cili u zhduk më parë këtë muaj, u shpall i vdekur.

Në Iran, të paktën 50 persona janë vrarë dhe më shumë se 500 të tjerë janë plagosur në sulmet ajrore amerikane gjatë tre javëve të fundit, thotë ministria e shëndetësisë e vendit.

Të shtunën, Këshilli i Bashkëpunimit të Gjirit - një aleancë që përfshin Bahreinin, Kuvajtin, Omanin, Katarin, Arabinë Saudite dhe Emiratet e Bashkuara Arabe - akuzoi Teheranin për shënjestrimin e infrastrukturës civile pasi Kuvajti tha se një termocentral dhe një impiant distilimi uji ishin goditur.

Të dielën, Kuvajti tha se i njëjti impiant i distilimit të energjisë dhe ujit ishte goditur për herë të dytë nga Irani brenda dy ditësh, duke rezultuar në një zjarr. Po bëhen përpjekje për të kontrolluar zjarrin, tha ai.

Irani tha se kishte shënjestruar gjithashtu një bazë ajrore dhe një depo të përdorur nga forcat amerikane në Kuvajt të shtunën.

Ndërkohë, SHBA-të kanë thënë se “kanë kryer sulme ekskluzivisht mbi objektiva ushtarake, përfshirë infrastrukturën logjistike ushtarake”, pasi Irani tha se u goditën ura dhe një stacion.

Sipas ligjit ndërkombëtar, sulmi ndaj civilëve ose zonave civile është i paligjshëm. Megjithatë, në rrethana të caktuara, objektet civile - si një urë ose një termocentral - e humbasin mbrojtjen e tyre nëse përdoren për të mbështetur përpjekjet luftarake të armikut.

Uashingtoni dhe Teherani arritën një marrëveshje paraprake për t’i dhënë fund luftës në qershor, por marrëveshja u prish brenda disa javësh - me Presidentin Donald Trump që e shpalli marrëveshjen “të përfunduar” më 8 korrik.

Të shtunën vonë, udhëheqësi suprem i Iranit, Mojtaba Khamenei, tha në një deklaratë me shkrim se "shkeljet e përsëritura" të marrëveshjes nga Amerika kishin "nxjerë në pah një të vërtetë themelore: nënshkrimi i presidentit amerikan është krejtësisht i pavlerë dhe i lirë nga besueshmëria", shkruan BBC.