Rexhep Qosja i lë amanet nipit: Dua të jem i varrosur pa fjalime, pa medie, pa lule
Drejtat Autoriale
Lexohet për: 3 min.
Dëgjoje me zë...
Rexhep Qosja i lë amanet nipit: Dua të jem i varrosur pa fjalime, pa medie, pa lule
23/04/2026 - 18:52
Linku u kopjua
Shkrimtari dhe studiuesi i shquar i letërsisë shqiptare, akademik Rexhep Qosja, i cili u nda sot nga jeta, ka lënë një letër amanet drejtuar nipit të tij, Valjetit.
Letra, e datës 30 prill 2016 dhe e nënshkruar personalisht nga Rexhep Qosja në Prishtinë është bërë publike nga nipi i tij si dëshmi e fjalës së dhënë dhe respektimit të amanetit.
Meqenëse kam jetuar duke besuar në mendimin shkencor, në ngritjen shpirtërore e në përparimin shoqëror, që e bën të mundshëm ai, dua të jem i varrosur pa ritual fetar.
Meqenëse kam jetuar dhe kam menduar, në pjesën më të madhe të kohës, duke shprehur pikëpamje kritike ndaj sundimtarëve e pushteteve të tyre, dua të jem i varrosur pa kurrfarë pranie zyrtare.
Meqenëse jam kujdesur të jetoj thjesht, ashtu thjesht dua të jem edhe i varrosur: pa fjalime, pa medie, pa lule, afër varrit të gruas sime Shpresës.
Vdes i qetë.
Meqenëse jetën, krijimtarinë mendore dhe veprimtarinë politike ia kam kushtuar lirisë, bashkimit dhe mirëqenies demokratike të popullit shqiptar mund të them se as Shqipërisë shtetërore e as Kosovës, të sotmes e ardhmërisë së tyre, nuk u kam mbetur borxh. Në qoftë se Kosova më ka mbetur borxh mua – këtë do të mund ta thonë historianët e ardhshëm të letërsisë, të kulturës e të mendimit politik shqiptar.
Nuk mendoj se vdes pa asnjë mëkat.
Meqenëse jam rritur, kam jetuar e kam punuar në kushte politike e shoqërore, që edhe pas çlirimit të Kosovës e të krijimit të shtetit të saj, ishin shumë të vrazhda, nuk mund të them se mospajtimet e mia të shprehura ishin gjithnjë të liruara prej disa gjykimeve e vlerësimeve më të ashpra se ç’do të duhej. Megjithatë, varrosjen e pres i bindur se kam jetuar, krijuar e vepruar duke bërë mirë, duke predikuar të mirën e duke përhapur njerëzillëkun.
