Kryetari i Lëvizjes Vetëvendosje, Albin Kurti, e ka quajtur konstruktiv takimin me liderin e PDK-së, Bedri Hamza, por tha se nuk u arrit ndonjë marrëveshje për t’i formuar institucionet e reja.

Ai shtoi se institucionet e reja duhet të formohen në përputhje me vullnetin qytetar në zgjedhjet e 7 qershorit.

Shefi i qeverisë në detyrë nënvizoi nevojën që të zgjidhet një figurë konsensuale për president, derisa shtoi se përgjegjësia iu takon të gjithë partive parlamentare.

Kurti sërish theksoi nevojën që të arrihet një pajtim i gjerë për presidentin, derisa përsëriti frazën që për të parin e vendit duhet siguri prej 84-85 deputetëve.

Ai foli edhe për refuzimin për takim nga kryetari i Aleancës, Ardian Gjini, gjë e cila sipas tij nuk duhej të ndodhte.

Kurti në diskutimet për presidentin para katër muajsh nuk e kishte ftuar fare Aleancën për takim.

Ai tha se përgjegjësi e tij si fitues i zgjedhjeve të 7 qershorit është formimi i qeverisë, por shtoi se zgjedhja e presidentit është përgjegjësi edhe e partive të tjera parlamentare.

Sipas tij, presidenti i ardhshëm duhet të jetë një figurë konsensuale me vlera të dëshmuara kombëtare e profesionale.

Ai la të nënkuptohet se nuk do të thirret shpejt seanca konstituive e Kuvendit dhe formimi i qeverisë, pasi tha se janë të interesuar t’i japin kohë diskutimeve dhe konsultimeve edhe për zgjedhjen e presidentit.

Kryeministri në detyrë, Albin Kurti, të premten ka ftuar në takim edhe kryetarin e LDK-së, Lumir Abdixhiku, dhe kryetarin e Aleancës, Ardian Gjini. Ky i fundit ka refuzuar takimin, derisa ka përmendur disa prej kërkesave të tij, përfshirë gazin amerikan për ta bërë kuorumin për presidentin.

KQZ certifikoi rezultatet e zgjedhjeve të 7 qershorit të mërkurën. Nga këto zgjedhje, parti e parë ka dalë Lëvizja Vetëvendosje me 47.13%, apo 53 ulëse në Kuvend. E dyta, Partia Demokratike e Kosovës, me 19.44%, apo 22 deputetë. Ndërkaq, Lidhja Demokratike e Kosovës, me 16.69%, ka fituar 18 ulëse, si dhe Aleanca, me 6.74%, shtatë ulëse. Kurse komunitetet joshumicë kanë siguruar 20 ulëse. /KosovaPress/

/Kosovapress/