Komisioni Qendror i Zgjedhjeve ka bërë të ditur se, në kuadër të angazhimit për administrimin e rregullt të procesit të votimit, KQZ ka funksionalizuar dhomën operative, e cila funksionon me pjesëmarrjen e anëtarëve të KQZ-së, Prokurorisë dhe Policisë së Kosovës.

Sipas zëdhënësit të KQZ-së, Valmir Elezi, tashmë të gjitha qendrat e votimit në Kosovë janë hapur për votuesit.

Komisioni Qendror i Zgjedhjeve fton të gjithë qytetarët që të ushtrojnë të drejtën e tyre të votës.

Ai tha se sa u përket subjekteve politike, në këto zgjedhje garojnë 21 subjekte politike, prej të cilave 17 parti politike, 3 koalicione dhe 1 kandidat i pavarur.

Elezi njoftoi se që në këtë orë të parë të procesit, përmes platformës elektronike çdo votues mund të kontrollojë se ku ndodhet qendra e tij e votimit.

Ai tha se nga ora 09:00 fillon regjistrimi i statistikave të pjesëmarrjes së qytetarëve në votime dhe se këto statistika do të publikohen çdo dy orë nga qendrat e votimit në Kosovë.

Sa u përket subjekteve politike, në zgjedhje marrin pjesë 21 subjekte politike, prej të cilave 17 parti politike, 3 koalicione dhe 1 kandidat i pavarur.

Numri i përgjithshëm i kandidatëve është 902 kandidatë. Po ashtu, përmes platformës elektronike, secili votues mund të kontrollojë se ku ndodhet qendra e tij e votimit.

Procesi i votimit do të zhvillohet në 949 Qendra të Votimit me gjithsej 2,550 vendvotime. Në 911 Qendra të Votimit me 2,498 vendvotime do të mundësohet votimi i rregullt, ndërkaq në 38 qendra të tjera, nga një për secilën komunë, me 52 vendvotime, do të mundësohet votimi me kusht.

Numri i qytetarëve me të drejtë vote në vendvotimet në Kosovë është 1 milion e 959 mijë e 962 votues.

/Kosovapress/