Sekretarja e përgjithshme e PDK-së, Vlora Çitaku reagoi pas konferencës për media të kryeministrit Albin Kurti, në të cilën akuzoi partitë opozitare për sjellje joshtetërore dhe anti-institucionaliste si dhe për mosnjohje të rezultatit zgjedhor të 28 dhjetorit.

Çitaku tha se vetë Kurti është ai që s’e njeh këtë rezultat zgjedhor.

Ajo e akuzoi Kurtin si shkelës serik tëi Kushtetutës,  që nuk e ka problem ta përmbys edhe rendin Kushtetues, por theksoi,  këtë nuk do ta lejojnë.

“Albin,

Nëse ka një njeri që nuk e njeh rezultatin zgjedhor në Kosovë, ai je ti. Falë atij rezultati, ti e udhëheq Qeverinë dhe Kuvendin. Po 51% nuk janë 100%.

Kush është shtetar, institucionalist dhe respekton Kushtetutën, nuk dëshmohet vetëm nga e kaluara e largët, por mbi të gjitha nga veprimet e sotme.

Si opozitë, pa asnjë kusht, kemi votuar zgjatjet buxhetore dhe marrëveshjet ndërkombëtare, përfshirë edhe dje, madje edhe me procedurë të përshpejtuar.

Ti, Albin, nuk e njeh bashkëpunimin, as kompromisin. Ti kërkon nënshtrim. Dhe PDK nuk nënshtrohet.

Si shkelës serik  i Kushtetutës, nuk e ke problem ta përmbysësh edhe rendin Kushtetues. Por këtë nuk do ta lejojmë.

Ky vend dhe kjo Republikë janë ndërtuar me mund e me gjak. Dhe nuk do të lejojmë që të shkatërrohen”, shkroi Çitaku.

/Kosovapress/