12:20

Arrestohet edhe babai i të dyshuarit për vrasjen e imamit në Dragash

Prokuroria Themelore në Prizren bën të ditur se ka arrestuar të dyshuarin për vrasjen e imamit në Dragash, derisa në pranga ka përfunduar edhe babai i tij, përcjell KosovaPress.

Sipas prokurorisw arrestimi i babait të të dyshuarit ka ardhur pasi sipas kësaj prokurorie, dyshohet se ai nuk i ka dhënë ndihmë viktmës, pas therjes me thikë.

“I dyshuari B.H., pas kryerjes së veprës penale, fillimisht ishte në arrati, mirëpo si rezultat i veprimeve intensive operativo-hetimore të Policisë së Kosovës është lokalizuar dhe arrestuar. Me vendim të prokurorit të shtetit, i dyshuari B.H., është ndaluar për 48 orë, për shkak të dyshimit të bazuar se ka kryer veprën penale "Vrasja e rëndë", sipas Kodit Penal të Republikës së Kosovës. Po ashtu, është ndaluar për 48 orë edhe babai i tij, për shkak të dyshimit të bazuar për kryerjen e veprës penale "Mosdhënia e ndihmës", sipas Kodit Penal të Republikës së Kosovës. Trupi i pajetë i viktimës është dërguar për obduksion në Institutin e Mjekësisë Ligjore (IML), në Prishtinë”, thuhet në njoftimin e prokurorisë.

11:08

Është arrestuar i dyshuari për vrasjen e imamit të fshatit Zlipotok të Dragashit.

Lajmin për KosovaPress e ka konfirmuar zëdhënësi i policisë për rajonin e Prizrenit, Shaqir Bytyqi, i cili tha se për arrestimin janë angazhuar njësi të ndryshme.

“Pas veprimeve intensive operativo-hetimore të ndërmarra pa ndërprerje nga Policia e Kosovës, është arritur të lokalizohet dhe të arrestohet i dyshuari për rastin e vrasjes në fshatin Zlipotok, Dragash.  Në operacionin për lokalizimin dhe arrestimin e të dyshuarit janë angazhuar njësi të ndryshme policore, duke përfshirë përdorimin e dronit për vëzhgim nga ajri, si dhe njësinë policore me qen (K-9)”, tha Bytyqi për KosovaPress.

Tutje, ai tha se i dyshuari është shoqëruar në stacionin policor, ku ndaj të dyshuarit do të vazhdojnë procedurat e mëtejme hetimore në koordinim më prokurorin përgjegjës.

Imami i xhamisë në fshatin Zlipotok të Dragashit dyshohet se u vra mbrëmë pas një përleshjeje, ku u përdor edhe një mjet i mprehtë.

Lajmi në zhvillim...

/Kosovapress/