Fenomeni adoleshent i Barcelonës, Lamine Yamal, do të humbasë pjesën tjetër të sezonit për shkak të një dëmtimi në kofshë, konfirmoi klubi të enjten, por ai pritet të jetë i gatshëm për Spanjën në Kupën e Botës.

18-vjeçari, i cili shënoi golin e fitores kundër Celta Vigos për fitoren 1-0, të mërkurën, doli jashtë loje pak para pushimit, i zëvendësuar nga lojtari suedez Roony Bardghji. 

Në një deklaratë të publikuar në mediat sociale, klubi katalanas njoftoi se nga testimet e bëra është konfirmuar se Lamine Yamal ka dëmtim në kofshë në këmbën e majtë, si dhe do të ndjekë një plan trajtimi, kurse do të humbasë pjesën tjetër të sezonit por pritet të jetë në dispozicion për Kupën e Botës.

“Testet e kryera kanë konfirmuar se lojtari i ekipit të parë Lamine Yamal ka një dëmtim në kofshë në këmbën e majtë. Lojtari do të ndjekë një plan trajtimi konservativ. Lamine Yamal do të humbasë pjesën tjetër të sezonit dhe pritet të jetë i disponueshëm për Kupën e Botës” – njoftoi klubi.

Ndërkohë Yamal ka qenë në formë të shkëlqyer gjatë gjithë sezonit, duke shënuar 16 gola dhe duke kontribuar me 11 asiste në ligën e parë spanjolle, ndërsa ka shënuar gjashtë të tjerë në Ligën e Kampionëve.

Ai do të humbasë gjashtë ndeshje të Barcelonës për të përfunduar sezonin, përfshirë El Clasicon kundër Real Madridit më 10 maj, në atë që mund të jetë një kurorëzim katalanas në Camp Nou.

Pavarësisht se është vetëm 18 vjeç, Lamine Yamal ka tashmë 25 paraqitje për ekipin e tij kombëtar dhe do të jetë një pjesë kyçe e ekipit të tyre këtë verë.

KosovaPress