Kombëtarja A e vajzave të Kosovës në volejboll po vazhdon të tregojë progres të dukshëm në arenën ndërkombëtare, teksa ka përmbyllur turneun e parë në kuadër të Ligës Evropiane të Volejbollit CEV 2026 në Bosnja dhe Hercegovina.

Megjithëse u mposhtën me rezultat 3-0 nga nikoqirët, vajzat kosovare lanë përshtypje pozitive me paraqitjen e tyre, duke rivalizuar fort në çdo set (25-18, 25-22, 25-23). Sipas stafit teknik, kjo dëshmon rritjen e ekipit dhe faktin se Kosova nuk është më vetëm pjesëmarrëse, por një kundërshtare konkurruese.

Përzgjedhësi Lorik Ilazi theksoi se ekipi ka afro katër javë që është i grumbulluar dhe përgatitjet kanë qenë intensive. Ai vlerësoi paraqitjet ndaj ekipeve të forta si Spanja dhe Bosnja, duke nënvizuar se Kosova tashmë po tregon karakter dhe luftë sportive deri në pikët e fundit.

“Ne kemi thuajse katër javë që jemi të grumbulluar. Gjithashtu ne e kemi përfunduar turneun e parë të cilin e kishim në Bosnje, kundër Bosnjës dhe ekipit të Spanjës, ku mund të them se ishte një turne shumë i suksesshëm pasi që është hera e parë që ekipi i Kosovës ishte një ekip konkurrues dhe ne arritëm që nga Spanja, nga një kundërshtar shumë i fuqishëm, ta rrëmbejmë një set. Po gjithashtu edhe me ekipin e Bosnjës, ne zhvilluam ndeshje ku rezultatet nëpër sete ishin thuajse të pakuptueshme deri në momentin e fundit, që kjo e bën kombëtaren një ekip shumë më serioz se vitet e tjera”, u shpreh trajneri.

Pas përfundimit të turneut në Bosnja dhe Hercegovina, fokusi i “Dardaneve” zhvendoset te turneu i dytë në Ligën Evropiane të Volejbollit, CEV 2026 i cili do të zhvillohet në Greqi.

Ndër të tjerash, kryetrajneri theksoi se, pavarësisht kundërshtarëve të fortë, Kosova synon paraqitje të mira dhe fitore, duke u mbështetur në progresin e ekipit, përgatitjen intensive dhe bashkëpunimin e shkëlqyer brenda skuadrës.

“Ne e dimë do të thotë i kemi kombëtaret e fuqishme përballë, janë të katër kombëtaret të cilat janë pjesë e një Kampionati Evropian që është tani në garë, po gjithashtu do të thotë edhe konkurrentë për futjen edhe në garë të Kampionatit Evropian pasi që dihet se ne jemi në kualifikime për Kampionatin Evropian. Megjithatë ne presim thashë edhe rezultate shumë të mira dhe ngritje të kombëtares”, tha Ilazi.

Ndërkohë, lojtaret u shprehën optimiste për garat në vazhdim. Kapitenia, Adelajda Prenga, theksoi se atmosfera në ekip është shumë e mirë dhe grupi është më i konsoliduar se viteve të kaluara.

“Grupi në Greqi për të thënë të drejtën e kemi pak më të vështirë nga grupet e tjera, por ne jemi duke punuar jashtëzakonisht shumë. Kemi një grup me goca fantastike, gjë që është shumë e mirë për ne sepse kemi vite që jemi bashkë me njëra-tjetrën. Jemi të komponuara shumë mirë, kështu që sigurisht që presim dhe fitore”, tregon Prenga.

Volejbollistja Venera Kadriu theksoi se është nder për Kosovën pjesëmarrja në këtë kompeticion, duke shtuar se Kombëtarja po shënon ngritje të vazhdueshme nga viti në vit. Ajo vlerësoi se garat e CEV-it kanë ndikuar pozitivisht si në zhvillimin individual të lojtareve, ashtu edhe në rritjen e nivelit të ligës vendore.

“Është nder, por edhe si ekip kemi qejf t’i prezantojmë ngjyrat e flamurit denjësisht edhe të paraqitemi sa më mirë. Jemi shumë me fat që kemi marrë pjesë në këtë kompeticion, pasi që çdo vit po ngritet kombëtarja. Tashmë është viti i tretë që vazhdimisht merremi me një lloj të kompeticionit të Konfederatës së CEV-it, të Evropës domethënë që Kombëtarja e Kosovës të thirret edhe kjo na ka ndihmu shumë që të ngritemi edhe individualisht, por edhe ta ngritim edhe Ligën e Kosovës pasi që shumica e vajzave janë nëpër ekipet e Kosovës edhe çdo vit e shohim ngritjen nëpër play-off-a ose finale të Kupave të ndryshme gjatë kompeticioneve ose xhiros së rregullt të Kosovës”, shtoi volejbollistja Kadriu.

Kosova do të vazhdojë garën me turneun e radhës në Greqi, ku me 12 qershor do të përballet me Greqinë nga ora 20:00 dhe me 14 qershor me Portugalinë po në të njëjtën orë, në Sallën Kombëtare të Sporteve Neapolis, Larisa, ndërsa më pas do të zhvillojë ndeshje edhe në Prishtinë kundër Malit të Zi dhe Hungarisë.

Pavarësisht kundërshtarëve të fortë, nga kampi i kombëtares mbizotëron optimizmi se me punë dhe përkushtim mund të arrihen rezultate pozitive, duke vazhduar kështu ngritjen e volejbollit kosovar në skenën evropiane.

KosovaPress