Vehbi Miftari bën të ditur se është liruar nga detyra e shefit të Misionit të Kosovës në Selinë e Shenjtë, pas pranimit të dekretit nga ushtruesja e detyrës së Presidentes, Albulena Haxhiu.

Në një postim në Facbook, Miftari ka bërë të ditur se me këtë dekret përfundon mandati i tij në Vatikan, duke e cilësuar këtë rol si një nder jetësor, pasi ishte shefi i parë i këtij misioni, transmeton KosovaPress.

Ai ka theksuar se largohet i kënaqur me arritjet, duke shtuar se marrëdhëniet mes Kosovës dhe Selisë së Shenjtë tashmë janë të konsoliduara plotësisht.

Miftari ka falënderuar Presidenten Vjosa Osmani për besimin e dhënë, qytetarët për përkrahjen dhe Selinë e Shenjtë për bashkëpunimin dhe mikpritjen.

Sipas tij, mandati dyvjeçar është karakterizuar nga angazhim dhe sfida të vazhdueshme, por njëkohësisht ka qenë i frytshëm.

Ai ka bërë të ditur se është në përgatitje për dorëzimin e detyrës tek pasardhësi apo pasardhësja, duke theksuar gatishmërinë që procesi të zhvillohet në mënyrë që të mos dëmtohen marrëdhëniet e ndërtuara.

/Kosovapress/