Presidenti amerikan Donald Trump tha të enjten se Shtetet e bashkuara do të dërgojnë edhe 5,000 trupa shtesë në Poloni.

“Bazuar në zgjedhjen e suksesshme të tashmë Presidentit të Polonisë, Karol Nawrocki, të cilin pata krenarinë ta mbështes, dhe marrëdhënien tonë me të, kam kënaqësinë të njoftoj se Shtetet e Bashkuara do të dërgojnë edhe 5,000 trupa shtesë në Poloni,” shkroi Trump në Truth Social, raporton AP, përcjellë KosovaPress.

Ky qëndrim ka shkaktuar konfuzion pas deklaratave të ndryshueshme që ai ka bërë javët e kaluara për uljen, dhe jo rritjen, e pranisë ushtarake amerikane në Evropë.

Administrata Trump kishte deklaruar se po reduktonte praninë ushtarake në Evropë me rreth 5,000 trupa, ndërsa zyrtarë amerikanë konfirmuan se rreth 4,000 ushtarë nuk do të dislokoheshin më në Poloni, gjë që kishte trazuar këtë shtet, por edhe vendet tjera evropiane.

Shefi i Shtëpisë së Bardhë dhe Pentagoni kanë deklaruar javët e fundit se po tërhiqnin të paktën 5,000 trupa nga Gjermania, pasi kancelari Friedrich Merz tha se SHBA-ja po “poshtërohej” nga udhëheqja iraniane dhe kritikoi atë që e quajti mungesë strategjie në luftë.

Ligjvënës demokratë dhe republikanë e kritikuan uljen e trupave, duke thënë se kjo dërgon sinjalin e gabuar si për aleatët, ashtu edhe për presidentin rus Vladimir Putin gjatë luftës katërvjeçare në Ukrainë.

Kongresmeni republikan Don Bacon nga Nebraska tha gjatë një seance dëgjimore në Kongres se kishte folur me zyrtarë polakë dhe ata ishin “kapur në befasi”. Ai e quajti vendimin për reduktim të trupave në Poloni “të turpshëm” dhe tha se ishte “një turp për vendin tonë ajo që sapo i bëmë Polonisë”.

Zëdhënësi kryesor i Pentagonit, Sean Parnell, tha të martën se bëhej fjalë për “një vonesë të përkohshme” të dislokimit të forcave amerikane në Poloni, të cilën ai e quajti “një aleate model e SHBA-së”. Ai tha se kjo ishte rezultat i reduktimit të numrit të brigadave luftarake të caktuara për Evropën nga katër në tre dhe la të kuptohet se Pentagoni ende duhej të vendoste se cilat trupa do të stacionoheshin dhe ku.

Zyrtarë amerikanë të mbrojtjes shprehën konfuzion të premten lidhur me njoftimin e ri të Trump.

“Ne kaluam pjesën më të madhe të dy javëve duke reaguar ndaj njoftimit të parë. As ne nuk e dimë çfarë do të thotë kjo,” tha një zyrtar. Të dy folën në kushte anonimiteti për të diskutuar çështje të ndjeshme ushtarake.

Njoftimi i Trump erdhi ndërsa sekretari i Shtetit Marco Rubio ishte rrugës për në Suedi për t’u takuar me homologët e tij të NATO-s, të cilët kanë vënë në pikëpyetje politikat e administratës Trump për reduktimin e trupave amerikane në Evropë.

“Duket se nuk ka asnjë proces të mirëfilltë për shqyrtimin e politikave si tërheqjet dhe dislokimet e trupave në nivelet më të larta,” tha Ian Kelly, diplomat karriere në pension, i cili shërbeu si ambasador i SHBA-së në Gjeorgji gjatë administratave Obama dhe Trump dhe tani jep mësim marrëdhënie ndërkombëtare në Universitetin Northwestern në Illinois.

Sipas tij, Rubio mund ta ketë të vështirë t’ua shpjegojë evropianëve lëkundjet e mëdha të Trump, ndërsa ata kërkojnë siguri dhe qëndrueshmëri, edhe nëse mund të mos pajtohen me të.

“Këto nuk janë vendime të menduara mirë,” tha Kelly. “Këto janë vendime impulsive të bazuara në tekat e Trump ose në atë që këshilltarët e tij mendojnë se janë tekat e Trump.”