Ministria e Bujqësisë, Pylltarisë dhe Zhvillimit Rural (MBPZhR) ka hapur thirrjen për aplikim në kuadër të Programit për Pagesa Direkte 2026, duke ftuar fermerët në mbarë vendin që të aplikojnë për subvencione në mbështetje të prodhimit bujqësor dhe zhvillimit rural.

Sipas njoftimit, aplikimi ka nisur më 22 qershor dhe do të jetë i hapur deri më 21 korrik 2026, në ora 16:00. Fermerët mund t’i dorëzojnë aplikimet në Drejtoritë Komunale për Bujqësi në komunat përkatëse.

Programi i sivjetmë është ridizajnuar në përputhje me harmonizimin gradual të politikave bujqësore me standardet e Bashkimit Evropian dhe përfshin katër shtylla kryesore të mbështetjes: Pagesat Bazë për të Ardhura sipas sipërfaqes së kultivuar, Pagesat Rishpërndarëse për fermerët e rinj dhe hektarët e parë të fermës, Pagesat e Lidhura me Prodhimin dhe Cilësinë, si dhe Eko-Skemat për prodhim organik dhe praktika miqësore me mjedisin.

Mbështetja financiare përfshin një gamë të gjerë sektorësh, duke përfshirë drithërat, perimet, pemishtet, vreshtat, blegtorinë, bletarinë, bimët mjekësore dhe aromatike, si dhe prodhimin organik.

MBPZhR ka bërë të ditur se kriteret e pranueshmërisë dhe dokumentacioni i nevojshëm ndryshojnë sipas sektorëve dhe kulturave bujqësore, ndërsa dokumentet duhet të dorëzohen brenda afatit të aplikimit.

Institucionet kanë paralajmëruar se gjatë kontrolleve në terren do të verifikohen të dhënat e deklaruara nga aplikuesit dhe në rast të parregullsive do të zbatohen masa ndëshkimore sipas legjislacionit në fuqi.

Ministria e Bujqësisë dhe Agjencia për Zhvillimin e Bujqësisë u kanë bërë thirrje të gjithë fermerëve që të aplikojnë brenda afatit dhe të sigurojnë dokumentacionin e kërkuar për kategorinë përkatëse të mbështetjes.

/Kosovapress/