Filmi më i ri “Odisea” ka zgjuar interesim të madh te publiku në Kosovë, duke mbushur sallat e Cineplexx Kosova që në natën e parë të shfaqjes, të enjten mbrëma.

Shfaqja e filmit është cilësuar si një prej ngjarjeve më të rëndësishme kinematografike të vitit, jo vetëm për shkak të interesimit të lartë të publikut, por edhe për teknologjinë e përdorur gjatë realizimit të tij.

Shefi i Marketingut në Cineplexx Kosova, Fidan Kapuqi, ka thënë për KosovaPress se premiera e filmit përbën një nga ngjarjet më të mëdha të kinematografisë këtë vit, ndërsa ka veçuar edhe faktin se filmi është realizuar me teknologjinë dhe kamerat IMAX.

Teknologji të cilën vetëm Cineplexx Kosova e posedon në rajon.

Përveç aspektit teknologjik dhe interesimit të madh, filmi lidhet edhe me trashëgiminë artistike të aktorit legjendar shqiptar Bekim Fehmiu, meqë e kishte luajtur rolin që tash e iu besua Matt Damon. Sipas tij, nata e shfaqjes ka shërbyer edhe si një formë homazhi për veprën dhe artin e tij.

Kapuqi: Teknologji të cilën ne me shumë krenari, jemi të vetmit në rajon që e posedojmë

video

“Sonte e kemi natën më të madhe të kinematografisë të filmit këtë vit, e kemi shfaqjen e filmit Odisea, i cili është filmi i parë në botë i xhiruar me teknologjinë dhe kamerat IMAX. Teknologji të cilën ne me shumë krenari, jemi të vetmit në rajon që e posedojmë.. 2:57 Për neve bart edhe një krenari të veçantë për shkak që është filmi që është luajtur në vitin 1968 nga aktori legjendar Bekim Fehmiu, me të cilin ne ndjejmë shumë krenari dhe natën e sotme pak a shumë e kemi homazhë për veprën dhe artin e Bekim Fehmiut”, tha ai.

Kapuqi ka thënë se filmi ka krijuar jehonë të madhe jo vetëm në Kosovë, por edhe në mbarë botën, duke marrë vëmendje dhe komente të shumta.

Sipas tij, interesimi i publikut pritet të vazhdojë edhe gjatë ditëve në vijim, ndërsa Cineplexx Kosova është shprehur e kënaqur me vëmendjen që filmi ka marrë nga adhuruesit e kinematografisë.

Kapuqi: Jemi me tre salla momentalisht dhe janë të gjitha të mbushura

video

“Filmi Odisea ka muaj të tërë që ka bërë një boom shumë të madh jo vetëm në Kosovë por gjithë botën. Ka pasur revieës dhe komente nga më të ndryshmet dhe sonte siç e patë jemi me tre salla momentalisht që po e tregojnë filmin e Odisesë dhe janë të gjitha të mbushura. Gjithashtu edhe ditëve të tjera, jemi të kënaqur me vëmendjen që e kanë ndaj filmit në sallë”, u shpreh ai.

Premierën e filmit, krahas shumë qytetarëve, e ndoqën edhe figura publike. Ndër to, edhe aktorja, njëkohësisht deputete Adriana Matoshi.

Për të filmi ishte i jashtëzakonshëm dhe ia vlen që të shikohet, ndërsa e vlerësoi lartë faktin se filmi përmban edhe motive nga muzika shqiptare. Ani se kohëzgjatja e filmit është tre orë, për të nuk është vërejtur fare.

Matoshi: Kam dalur nga filmi shumë e relaksuar edhe pse ka zgjatur shumë

video

“Salla ishte plot, interesimi ka qenë i jashtëzakonshëm. Filmi është i mrekullueshëm, fillim, mbarim të mban, në asnjë moment nuk bëhet bajat, ka shumë tension. Gjatë studimeve në akademinë e arteve i kemi mësuar të gjithë antikën, por shumë personazhe që janë përmendur për një moment më është blloku truri edhe pse e dija rrëfimin e Odisesë. Kam dalur nga filmi shumë e relaksuar edhe pse ka zgjatur shumë, por nuk është vërejtur koha që na ka marrë. Ja vlen me ardhë dhe me pa. Në film ka pas kolona zanore prej nesh”, tha Matoshi.

Në mbarë botën, filmi më i ri me regji të Christopher Nolanit, është shndërruar në një nga ngjarjet më të mëdha kinematografike të vitit 2026.

/Kosovapress/