Prokuroria e Posaçme kundër Korrupsionit dhe Krimit të Organizuar (SPAK)njoftoi sot finalizimin e një operacioni të gjerë kundër një grupi të strukturuar kriminal të përfshirë në trafikun ndërkombëtar të lëndëve narkotike dhe pastrimin e produkteve të veprës penale.

Në kuadër të procedimit penal, Gjykata e Posaçme kundër Korrupsionit dhe Krimit të Organizuar (GJKKO), me vendim të datës 14 prill ka caktuar masën e sigurisë “arrest në burg” për 11 shtetas shqiptarë.

Sipas njoftimit, hetuesit e Byrosë Kombëtare të Hetimit në bashkëpunim me Drejtorinë e Përgjithshme të Policisë së Shtetit kanë bërë të mundur zbatimin e masave të sigurisë ndaj shtetasve:

F.M, i datëlindjes 20.2.1992;

L.P, i datëlindjes 06.7.1974.

A.K, i datëlindjes 19.6.1993.

Drejtoria e Përgjithshme e Policisë së Shtetit në Bashkëpunim me hetuesit e BKH vazhdojnë me veprimet proceduriale dhe operative për lokalizimin e shtetasve të tjerë, ndaj të cilëve është caktuar masa e sigurisë personale “arrest në burg”. Disa prej këtyre personave nuk ndodhen në territorin e Republikës së Shqipërisë.

Operacioni është zhvilluar në bashkëpunim të ngushtë me Eurojust, Europol dhe autoritetet ligjzbatuese në Francë, Holandë dhe Mbretërinë e Bashkuar, ndërsa hetimet janë ndjekur nga Byroja Kombëtare e Hetimit (BKH) nën drejtimin e prokurorëve të posaçëm.

Sipas hetimeve, gjatë viteve 2019–2021, grupi kriminal ka operuar në Amerikën Latine dhe në disa vende të Evropës, duke organizuar të paktën 8 episode të trafikimit të kokainës në sasi të mëdha. Një pjesë e këtyre ngarkesave është sekuestruar në porte të rëndësishme evropiane, si në Roterdam dhe Amsterdam, ndërsa droga fshihej në kontejnerë me produkte të ndryshme si fruta, peshk apo lëngje të ngrira.

Çështja përfshin disa episode të trafikimit të lëndëve narkotike në vitin 2020, duke nisur me trafikimin e një sasie të konsiderueshme lënde narkotike kokainë gjatë periudhës janar-mars. Nga kjo sasi, u sekuestruan 8.5 kg në qytetin e Amsterdamit të Mbretërisë së Holandës. Po ashtu, sasia e trafikuar nga Peruja drejt Portit të Roterdamit të Holandës kishte vlerë shitjeje mbi 1.3 milionë euro.

Episodet e tjera kanë të bëjnë me trafikimin e një sasie prej 2020 kg lëndë narkotike të llojit kokainë, nga Ekuadori drejt Portit të Roterdamit të Holandës, tentativa e trafikimit të një sasie prej 516 kg lënde narkotike kokainë, e sekuestruar në Terminalin Portual Muelle Sur, DP World Callao, Peru, si dhe e destinuar për në Mbretërinë e Holandës, trafikimi i një sasie prej 500 kg lënde narkotike kokainë e sekuestruar në Portin e Roterdamit, që kishte ardhur në një kontejner nga Kolumbia që përmbante konserva me peshk ton dhe ishte i destinuar për një kompani në Gjermani.

Po ashtu, në gusht 2020 u dokumentua trafikimi i një sasie të konsiderueshme lënde narkotike e llojit kokainë, e llogaritur në rreth 1600 kg, prej së cilës është sekuestruar një sasi prej 104 kg po në të njëjtën datë në autostradën nr A2 pranë qytetit Abcoude të Mbretërisë së Holandës, trafikimi i një sasie rreth 1100 pako me peshë bruto 1238,39 kg lënde narkotike kokainë, e cila ishte ishte fshehur në një ngarkesë me banane në një kontenier që vinte nga Ekuadori drejt Portit të Roterdamit në Hollandë dhe kishte mbërritur në portin e Roterdamit me një anije detare e ardhur nga Porti i Antwerp, e destinuar për një kompani në Hagë, trafikimi i një sasie prej  531 kg lënde narkotike kokainë në Portin e Roterdamit, Hollandë, sasi e cila është kapur nga autoritetet holandeze, e fshehur në një kontenier të ngarkuar me rrush të thatë, i destinuar për në Suedi.

Në kuadër të hetimeve, GJKKO ka vendosur gjithashtu sekuestrimin preventiv të 232 pasurive me një vlerë totale rreth 12 milionë euro. Mes tyre përfshihen kompani tregtare, kuota në shoqëri të ndryshme, pasuri të paluajtshme si toka, apartamente dhe hotele në disa qytete të vendit, si dhe 89 automjete dhe 72 llogari bankare.

Konkretisht: Pasuritë e Shoqërisë “P… GROUP”, sh.p.k, me seli në Tiranë, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë.

Kuotat e Shoqërisë “HEC A…I”, sh.p.k, me seli qendrore në Fierzë, Bashkia Fushë Arrëz në masën 33.30 % , të cilat i përkasin ortakut “P… GROUP” sh.p.k.

Kuotat e Shoqërisë “B….V”, sh.p.k, me seli qendrore në Lezhë, fshati Fang, Rubik, në masën 50.00 %, të cilat i përkasin ortakut “P… GROUP” sh.p.k.

Kuotat e Shoqërisë “Sh……i 2013”, sh.p.k, me seli qendrore në Shëngjin, Lezhë, në masën 50.00 %, të cilat i përkasin ortakut L.P.

Pasuritë e Shoqërisë “O….. Hotel”, sh.p.k, me seli në Tiranë, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë.

Pasuritë e Shoqërisë “M….. N… A………”, sh.p.k, me seli në Tiranë, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë.

Pasuritë e Shoqërisë “E…… AL”, sh.p.k, me seli qendrore në Ishull-Shëngjin Lezhë, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë.

60 pasuri të paluajtshme të llojeve tokë arë, tokë truall, hotel, poste parkimi dhe apartamente, me vendndodhje në Tiranë, Kamëz, Lezhë, Shëngjin, Sarandë dhe Himarë.

89 automjete të markave dhe llojeve të ndryshme (automjete teknologjike për ndërtim, transport mallrash apo autovetura).

72 llogari bankare që u përkasin personave të ndryshëm juridikë apo fizikë, si dhe shtetasve nën hetim, apo personave të lidhur me ta.

Policia e Shtetit dhe Agjencia e Administrimit të Pasurive të Sekuestruara dhe Konfiskuara kanë nisur procedurat për bllokimin e këtyre aseteve, raporton ATSH.

SPAK vlerësoi bashkëpunimin me partnerët ndërkombëtarë dhe institucionet vendase, duke theksuar rëndësinë e koordinimit në luftën kundër krimit të organizuar dhe trafikut ndërkombëtar të narkotikëve.

/Kosovapress/