Policia e Shtetit ka finalizuar operacionin e koduar “Flagranca”, duke goditur një rast të kultivimit të bimëve narkotike në fshatin Ivanaj, në Malësi të Madhe.

Sipas njoftimit të policisë, operacioni u zhvillua pas hetimeve intensive dhe përdorimit të metodave proaktive për identifikimin e aktivitetit kriminal. Gjatë kontrollit në terren, policia zbuloi një parcelë ku ishin kultivuar 306 bimë të dyshuara narkotike të llojit Cannabis Sativa, të cilat u asgjësuan me djegie.

Në vendin e ngjarjes u kapën në flagrancë dhe u arrestuan dy persona, të identifikuar me inicialet N.Z., 40 vjeç, banues në fshatin Guci e Re, dhe K.P., 43 vjeç, banues në fshatin Grudë e Re. Ata dyshohen se kanë kultivuar bimët narkotike.

Policia bëri të ditur se kontrollet do të vazhdojnë në të gjithë territorin e qarkut Shkodër, me qëllim parandalimin dhe goditjen e rasteve të kultivimit të bimëve narkotike.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm në Shkodër për veprime të mëtejshme hetimore.

/Kosovapress/