Gjergji tregon për provokimin që përçoi dhe reagimet që mori pas trilogjisë “Kthimi”
Intervista
Lexohet për: 8 min.
10 muaj më parë
Linku u kopjua
(Lajm i plotësuar)
Dy vjet më parë, Dodë Gjergji iu ofrua publikut me trilogjinë “Kthimi” që për autorin qëllim kryesor kishte njohjen e së kaluarës. Fabula që ndërtohet mbi historinë e Shpresës dhe Gjonit, të cilët kërkojnë të zbulojnë identitetin kishtar të të parëve.
Në një intervistë për KosovaPress, Gjergji flet me shumë për romanin dhe mesazhin që synoi të përcillte te publiku.
Kreu i Kishës katolike thotë se gjithmonë ka dashur që dikush të shkruante një roman të tillë në mënyrë të padhembshme që individi të kuptojë dhe të njohë vetveten dhe të mos ketë frikë të marrë guximin për të përcaktuar të pranojë apo ta refuzojë propozimin për kthim.
I pyetur për reagimet që mori pas publikimit, Gjergj zbulon se kanë qenë tri llojesh.
Gjergji: Shqiptarët nuk duhet të jenë delja e zezë në shoqërinë evropiane
Ipeshkvi Dodë Gjergji mendon se shqiptarët janë “në shtratin e tyre kulturor e politik” dhe nuk ka nevojë të përqafojë rryma që mund ta shndërrojnë në delen e zezë në shoqërinë evropiane.
I pyetur nëse po cenohet identiteti kombëtar i shqiptarëve dhe rruga ku po vazhdon Kosova, shpesh kur në diskutim shtrohen çështje të karakterit fetar ekstremist, Gjergji thotë se gjithmonë duhet të jemi të kujdesshëm se çfarë vlerash do të përfaqësojmë në shoqërinë evropiane.
Figurat kombëtare që i përkasin fesë katolike jo rrallëherë kanë qenë cak i fyerjeve, por edhe në këtë rast Gjergji thotë se më shumë tregon për ata që flasin dhe aspak për ata mbi të cilët flitet.
Harmonia fetare vijon të mbetet një nga veçoritë me të cilët krenohen shumë shqiptarët. Kreu i Kishës katolike shprehet se kjo pasuri është shekullore dhe na bënë komb më të fortë.
Në fund, Gjergji thotë se angazhimi i tij dhe i Kishës për paqe nuk do të mungojë kurrë, që ajo të jetë në zemrat e njerëzve në kishën që drejton dhe në çdo bashkësi fetare në Kosovë.
Nga statusi juridik e financat e kishës te Kodi Civil, Gjergji flet edhe për ikjen e të rinjve
Kosova ende nuk ka një ligj që rregullon statusin juridik të bashkësive fetare. Zhgënjimi dhe lodhja nga diskutimet për një temë të tillë vihet re menjëherë në fytyrën e kreut të Kishës katolike në Kosovë. Dodë Gjergji thotë për KosovaPress se janë bërë si “papagall” duke përsëritur mendimet për një projektligj që nuk po kalon për dhjetë vjet.
Në fillim të këtij viti, Qeveria e Kosovës kaloi Projektligjin për Liritë Fetare mirëpo ende nuk ka marrë bekimin e Kuvendit të Kosovës për të hyrë në fuqi dhe, mjerisht, ende nuk dihet se kur mund të ndodhë kjo për shkak të bojkotit të deputetëve serbë, votat e të cilëve janë të nevojshme për miratimin e tij.
Në lidhje me projektligjin që ka kaluar në Qeveri, Gjergji thotë se e pranojnë pavarësisht se nuk janë dakord me tërësinë e saj.
Transparenca financiare është një nga pikat ku ka më së shumti ka vërejtje për të gjitha bashkësitë fetare. Projektligji i mbetur pezull synon ta rregullojë edhe këtë çështje dhe Gjergji thotë se asnjëra prej bashkësive nuk e ka problem të bëjë transparente të hyrat e saj.
Njëjtë sikurse Projektligji për Liritë Fetare, një tjetër projektligj nuk po arrin të miratohet në Kuvend. Ai është Kodi Civil. Nëse për të parin bashkësitë fetare këmbëngulin që të miratohet, për të dytin thirrja është e kundërt.
Mospajtimet janë te neni, i cili do të mundësonte hartimin e një ligji të posaçëm, përmes të cilit do të lejohej regjistrimi i "bashkësive civile" ndërmjet personave me gjini të njëjtë.
Në të vërtetë, komunitetet fetare njëzëri kërkojnë një Kod Civil që do të respektojë familjen e natyrshme.
Gjergji bën thirrje që njerëzit t’i kthehen vlerave dhe respektit të së kaluarës.
Duke u ndalur të largimi në masë të madhe jo vetëm i të rinjve nga Kosova, kreu i Kishës katolike thotë se “të gjithë” e sollën vendin në këtë situatë.
Kreu i Kishës katolike, Dodë Gjergji deklaron se Vatikani de-facto e ka njohur Kosovën me hapat konkretë që ka ndërmarrë ndaj vendit tonë, megjithëse shton se ka ende hezitim për njohjen de-jure.
Gjergji thotë se thirrja dhe insistimi i Kishës katolike në Kosovë është e vazhdueshme edhe për një njohje “me letra” të shtetit të Kosovës nga ana e Vatikanit dhe se përpjekjet e tilla nuk do të pushojnë deri në arritjen e qëllimit, pavarësisht se thekson edhe rëndësinë e autoriteteve në raportet shtetërore.
Kryeministri i Kosovës, Albin Kurti është lideri i fundit që është pritur në Selinë e Shenjtë pak kohë më parë. Mirëpo, as ky dhe as të tjerë para tij që kanë pasur mundësinë të priten nga kreu i Vatikanit nuk janë konsultuar me Kishën në Kosovë.
“Do të donim që të konsultohemi më shumë përpara se të shkonin kjo do të ishte gjëja më e duhur, por personat veçantë që kanë pasur këtë mundësi që të shkojnë në selinë e shenjtë të takojnë papën nuk e kanë parë të arsyeshme të konsultohen me neve”, vijon Gjergji.
“Sjellje adoleshente”, Gjergji për situatën në veri: Kujdes me aleatët, duhet paqe e pajtim
Ipeshkvi i Dioqezës Prizren-Prishtinë, Dodë Gjergji, në një intervistë ekskluzive për KosovaPress duke komentuar situatën e tensionuar të muajit të fundit në veri kërkon të ndërmerren veprime të matura pasi nuk duhet të rrezikojmë atë që e kemi fituar më 1999. Gjergji shprehet se deri më tani janë parë “sjellje prej adoleshenti të një shteti” që bën gabim të mendojë se nuk ka nevojë për ndihmën e atyre që e sollën deri në këtë ditë.
Kreu i Kishës katolike në Kosovë tregon edhe idenë e parealizuar të komunitetit fetar për të ndihmuar në lidhje me situatën në veri, ndërsa pyetet rreth dyshimeve të ngritura se Kisha ortodokse serbe po kontribuon në destabilizimin e vendit dhe për raportet e acaruara mes kryeministrit të Kosovës, Albin Kurti dhe atij të Shqipërisë, Edi Rama.
Më 26 maj kryetarët e zgjedhur të komunave Zubin Potok, Zveçan dhe Leposaviq tentuan të hyjnë në objektet komunale për të filluar punën, por hasën në rezistencën e protestuesve serbë. Nga ajo ditë pasuan akte të dhunshme në drejtim të policëve, trupave të KFOR-it dhe gazetarëve. Një situatë e brishtë ende po mbretëron në atë pjesë.
Imzot Gjergji thotë se situata e krijuar në komunat më veriore të Republikës duhet të zgjidhet me urtësi.
Kreu i Kishës katolike, duke nënkuptuar aleatët kur përmend figurën e “prindërve” thotë se ndonjëherë “njeriu duhet të heqë dorë nga e drejta vetë për të mirën e përgjithshme”.
Ipeshkvi Gjergji tregon edhe iniciativën e parealizuar të klerikëve që të lutën te ura e Ibrit. Megjithëse, nuk tregon se kush e pengoi një iniciativë të tillë, Gjergji shprehet se e vetmja rrugë për të dalë nga situata është paqja dhe pajtimi.
Gjergji beson se shqiptarët dhe serbët do të gjejnë rrugën e pajtimit dhe se për këtë ka edhe një vullnet të ndërkombëtarëve.
Ipeshkvi i Dioqezës Prizren-Prishtinë nuk shprehet i shqetësuar as me obligimin që ka marrë Kosova në marrëveshje me Serbinë për atë që është interpretuar si më shumë autonomi për Kishën serbe.
Megjithëse është i shkurtër dhe i kujdesshëm në fjalët që zgjedh, Gjergj thotë se do të ishte e papranueshme nëse Kisha ortodokse serbe po shfrytëzohet për destabillzim të vendit, siç u pretendua së fundmi edhe në Parlamentin britanik nga deputetja Alicia Kearns, që deklaroi se armët e kontrabanduara nga Serbia në Kosovë po mbahen në kishat ortodokse.
Javën e kaluar, kryeministri i Shqipërisë, Edi Rama, nuk u prit në takim nga kryeministri i Kosovës, Albin Kurti. I pyetur edhe për raportet mes liderëve, Gjergji u shpreh se “duhet të ulen gjakrat” dhe të mësohemi të flasim edhe me ata që mendojnë ndryshe.
