Federata Sindikale e Radiotelevizionit të Kosovës (RTK) dhe Sindikata e Pavarur e Punëtorëve të RTK-së (SPERTK) kanë paralajmëruar se do të organizojnë protestë të hënën, më 13 korrik, nëse pagat e punëtorëve nuk ekzekutohen gjatë ditës së sotme.

Sipas njoftimit të sindikatave, sot shënohet dita e dhjetë që punonjësit e transmetuesit publik kanë mbetur pa pagat e rregullta.

Ata bëjnë të ditur se, pas një takimi urgjent me ushtruesin e detyrës së drejtorit të përgjithshëm të RTK-së, është kërkuar alokimi i menjëhershëm i mjeteve financiare, ndërsa kanë vendosur ultimatum që në rast të mosrealizimit të pagesave, protestat do të nisin të hënën në orën 11:30 para objektit të RTK-së.

Sindikatat theksojnë se paga është një e drejtë ligjore dhe jo privilegj, duke shtuar se nuk ka më vend për premtime apo arsyetime burokratike që, sipas tyre, po rrezikojnë mirëqenien e qindra familjeve.

Përveç protestës, Federata Sindikale e RTK-së dhe SPERTK kanë paralajmëruar se do të kërkojnë llogaridhënie të plotë ligjore dhe morale nga Bordi dhe Menaxhmenti i RTK-së, të cilët i akuzojnë për dështim në sigurimin e funksionimit normal të transmetuesit publik dhe për përsëritjen e krizës së vonesës së pagave.

Sindikatat u kanë bërë thirrje të gjithë punëtorëve të RTK-së që të marrin pjesë në protestë dhe të qëndrojnë të bashkuar në mbrojtje të të drejtave të tyre.

/Kosovapress/