Derisa në Kosovë po përkujtohen krimet serbe gjatë luftës së fundit, Kuvendi i Serbisë ditë më parë, përmes një ekspozitë kushtuar kriminelit të luftës Obrad Stevanoviqit, një gjeneral i policisë serbe dhe një bashkëpunëtor i ngushtë i Slobodan Milosheviqit. Nga organizatat për të drejtat e njeriut kjo ekspozitë po cilësohet si përpjekje për revizionizëm historik dhe shtrembërim të fakteve të luftës në Kosovë.

Në Kuvendin e Serbisë është hapur ekspozita kushtuar Njësive Speciale të Policisë dhe komandantit të tyre, Obrad Stevanoviq. Pamjet nga hapja e saj kanë treguar edhe ministrin e Punëve të Brendshme të Serbisë, Ivica Daçiq, ish-zëdhënës i Slobodan Milosheviqit, duke shtrënguar duart dhe duke u buzëqeshur me veteranë, një gjest që është parë si anashkalim i fakteve të dokumentuara për krimet e luftës.

Ndërsa për autoritetet serbe kjo ekspozitë paraqitet si nderim për “heroizmin” e njësive policore, organizatat për të drejtat e njeriut e konsiderojnë atë një shenjë të qartë të revizionizmit historik dhe përpjekje për rehabilitimin e figurave të lidhura me krimet e luftës.

Drejtoresha e Fondit për të Drejtën Humanitare, Natasha Kandiq thekson se parlamenti nuk duhet të shërbejë si hapësirë për rehabilitimin e narrativave mbi njësi dhe komandantë që janë dënuar nga Tribunali i Hagës.

“Ekspozita nuk është një pasqyrim historik, por përpjekje për të shtypur faktet e vërtetuara gjyqësisht dhe për të legjitimuar një kujtesë selektive”, vlerëson ajo.

Kandiq paralajmëron se në ekspozitë mungojnë ngjarjet kyçe nga viti 1999.

“Nuk përmenden operacionet në zonën e Gjakovës, ku u vranë qindra civilë shqiptarë, as varrezat masive në Batajnicë apo krimet në Mejë, Korenicë dhe Beleg. Kjo nuk është lëshim, por mohim institucional”, thekson ajo.

Nga Nisma e të Rinjve për të Drejtat e Njeriut vlerësojnë hapjen e ekspozitës si problematike në kontekstin e përballjes me të kaluarën.

“Në vend që, 25 vjet pas zbulimit të varrezave masive sekrete në Serbi, provat për operacionin monstruoz të fshehjes së trupave të paraqiten në institucionin përfaqësues, ministri aktual i Punëve të Brendshme, si dhe nënkryetari i Kuvendit, kanë keqpërdorur Kuvendin për të tentuar të pastrojnë biografinë e një gjenerali”, thotë Marko Milosavleviq, nga Nisma e të Rinjve për të Drejtat e Njeriut, shkruan RTK.

Organizatat për të drejtat e njeriut paralajmërojnë se një qasje e tillë tregon shmangie nga përballja me të kaluarën dhe shtypje sistematike të fakteve për krimet e luftës, duke bërë thirrje për reagim të qartë institucional dhe shoqëror.