Legjenda e Manchester United, Wayne Rooney, ka lëshuar kritika të ashpra ndaj yllit të Liverpool-it, Mohamed Salah, pas komenteve të tij të fundit ndaj trajnerit Arne Slot.

Salah, i cili do të largohet nga Liverpool në fund të sezonit pas një epoke të artë me 257 gola të shënuar, kritikoi stilin aktual të lojës pas humbjes 4-2 ndaj Aston Villa-s, duke deklaruar se ekipi duhet t'i kthehet "futbollit heavy metal që u fut frikën kundërshtarëve".

Kjo deklaratë ka revoltuar Rooney-n, i cili mendon se egjiptiani nuk meriton as ndeshjen e lamtumirës këtë të dielë kundër Brentford-it.

Ish-sulmuesi anglez deklaroi se Salah nuk ka më fuqi për stilin e lojës që kërkon:

"Ai dëshiron të luajë futboll heavy metal, pra po thotë se dëshiron futbollin e Jurgen Klopp. Por unë nuk mendoj se Mo Salah mund ta përballojë më atë lloj futbolli. Mendoj se këmbët e tij nuk premtojnë më për atë ritëm dhe intensitet të lartë."

Rooney bëri thirrje për masa drastike nga trajneri aktual i Liverpool-it, duke sjellë në vëmendje edhe një eksperiencë personale me Sir Alex Ferguson:

"Nëse do të isha Arne Slot, nuk do ta kisha fare pranë stadiumit në ndeshjen e fundit. E kam provuar vetë këtë me Alex Ferguson. Pata një mosmarrëveshje dhe në ndeshjen e tij të fundit në Old Trafford, ai më la jashtë skuadre pikërisht për këtë arsye."

Sipas Rooney-t, Salah ka dëmtuar atmosferën brenda klubit përpara ndeshjes përmbyllëse të sezonit:

"Ai thjesht hodhi një granatë, tha se nuk i beson Arne Slot-it dhe pothuajse 'hodhi në baltë' shokët e tij të skuadrës që do të jenë aty sezonin e ardhshëm, duke i lënë ata të përballen me këtë situatë."

Liverpool do ta mbyllë një sezon pa trofe këtë të dielë në shtëpi, në atë që po kthehet në një lamtumirë të hidhur dhe të tensionuar për anësorin legjendar.

KosovaPress