Gjenerali Christopher Donahue do të mbahet mend për një histori të rrallë.

Ai ishte ushtari i fundit amerikan që u largua nga Afganistani, në vitin 2021, duke hipur në avionin ushtarak C-17 i cili u nis nga Kabuli, duke shënuar mbylljen e misionit militar të Shteteve të Bashkuara në këtë vend aziatik.

Ndërhyrja, në kuadër të operacionit "Operation Enduring Freedom" (Operacioni Liria e Qëndrueshme).erdhi pas sulmeve terroriste të 11 shtatorit 2001 në SHBA, me qëllim goditjen e rrjetit terrorist Al-Kaeda dhe rrëzimin e regjimit taleban, i cili strehonte liderin e Al-Kaedës, Osama bin Laden.

Pos kësaj historie, Donahue, që tashti është komandant i forcave amerikane në Evropë dhe Afrikë, do të mbahet mend edhe për një gjë tjetër – largimin e papritur nga ky post, më 2 korrik, vetëm 18 muaj pasi mori detyrën.

Lajmi u konfirmua nga Ushtria, e cila njoftoi se detyrat e tij do të kryhen përkohësisht nga zëvendësi i tij, gjeneralmajori Christopher Norrie, raporton AP, transmeton KosovaPress.

Donahue është njëri nga më shumë se dhjetë zyrtarët e lartë që janë pensionuar ose janë larguar para kohe nga detyra nën drejtimin e sekretarit amerikan të Mbrojtjes, Pete Hegseth. Ky i fundit ka promovuar politikën e reduktimit të numrit të gjeneralëve në ushtri me moton “më pak gjeneralë, më shumë ushtarë”.

I diplomuar në Akademinë Ushtarake West Point dhe me një karrierë të gjatë në forcat speciale, Donahue ka komanduar njësitë Delta Force në Irak dhe Afganistan, si dhe Divizionin e 82-të Ajror.

Sipas mediave amerikane, largimi i Donahue vjen në kohën kur Pentagoni po shqyrton mundësinë e uljes së statusit të Komandës së Ushtrisë Amerikane në Evropë dhe Afrikë nga nivel katër-yjesh në tre-yjesh, në kuadër të rishikimit të pranisë ushtarake amerikane në Evropë.

Javën e kaluar, Hegseth njoftoi aleatët e NATO-s se Pentagoni do të zhvillojë një rishikim gjashtëmujor të forcave amerikane në Evropë, me synimin që vendet evropiane të marrin më shumë përgjegjësi për mbrojtjen e kontinentit.