Në kuadër të përpjekjeve për masovizimin e aktiviteteve fizike dhe rritjen e sigurisë së fëmijëve në ujë, Komuna e Prishtinës ka nisur zyrtarisht programin e ri të mësimit të notit për nxënësit e shkollave publike të kryeqytetit.

Projekti është jetësuar përmes një bashkëpunimi dypalësh mes Drejtorisë së Arsimit dhe Drejtorisë së Sportit, të udhëhequr nga drejtori Granit Geci, në partneritet me ndërmarrjen "Sport Marketing".

Elshani: "Çdo nxënës i Prishtinës meriton ta ketë mundësinë ta mësojë notin"

"Çdo nxënës i Prishtinës meriton ta ketë mundësinë ta mësojë notin. Sot, bashkë me Drejtorin e Sportit, Granit Geci dhe Sport Marketing, e nisëm programin e mësimit të notit për nxënësit e shkollave publike të Prishtinës, për grupmoshat 9-11 vjeç," ka deklaruar Elshani.

Udhëheqësit komunalë kanë konfirmuar përkushtimin e tyre për t'u ofruar të gjithë fëmijëve të grupmoshave 9 deri në 11 vjeç qasje të barabartë në këtë disiplinë.

Më tej, i pari i arsimit kryeqytetas nëntashkroi rëndësinë e veçantë që bart noti përveç aspektit rekreativ e garues, duke e cilësuar atë si një element esencial të edukimit dhe sigurisë së fëmijëve.

Elshani: "Noti nuk është vetëm sport, është një aftësi jetësore"

"Noti nuk është vetëm sport. Është një aftësi jetësore që çdo fëmijë duhet ta ketë," është shprehur Elshani.

Ai bëri të ditur se sesionet stërvitore do të zhvillohen pa asnjë kosto financiare për familjet në hapësirat e Pishinës së Gërmisë nga fundi i korrikut deri në pjesën e dytë të gushtit, ndërsa ftoi të gjithë prindërit që t'i regjistrojnë fëmijët e tyre përmes platformës online noti.kryeqyteti.net.

Kjo iniciativë pritet të shërbejë si bazë e mirë për zhvillimin e mëtejmë të sporteve ujore në kryeqytet, duke ndihmuar njëkohësisht në zbulimin e talentëve të rinj që nesër mund të përfaqësojnë Prishtinën edhe në nivel garues.

KosovaPress