Ka nisur rrënimi i objekteve të ndërtuara pa leje në pronën e Ndërmarrjes Publike Hidroekonomike “Ibër-Lepenc”, pranë Liqenit të Ujmanit, ndërsa në mesin e tyre janë edhe dy vila që, sipas burimeve të KosovaPress-it, i përkasin kryesuesit të Kuvendit Komunal të Mitrovicës së Veriut, Ivan Zaporozhac, dhe vëllait të tij.

Aksioni ka nisur të martën në mëngjes, me kërkesë të “Ibër-Lepencit”, për lirimin e pronave të uzurpuara në parcelat që janë në pronësi të kësaj ndërmarrjeje publike.

Kryeshefi ekzekutiv i “Ibër-Lepencit”, Faruk Mujka, ka konfirmuar për KosovaPress se aksioni po zhvillohet nga Inspektorati i Ministrisë së Mjedisit, Planifikimit Hapësinor dhe Infrastrukturës.

“Inspektorati i Ministrisë së Ambientit është duke e zhvilluar këtë aksion”, deklaroi Mujka.

Ai bëri të ditur se më 3 korrik, 11 personave që kishin ndërtuar objekte në pronën e “Ibër-Lepencit” u ishte kërkuar t’i largonin gjësendet nga këto objekte dhe t’i lironin ato më së largu deri më 17 korrik.

Edhe zëvendësdrejtori i Policisë për rajonin e veriut, Veton Elshani, konfirmoi për KosovaPress se Policia e Kosovës është duke asistuar në mbarëvajtjen e aksionit.

Ky operacion vjen pas paralajmërimit të mëhershëm të “Ibër-Lepencit”, i cili u kishte bërë thirrje 11 personave që kishin ndërtuar shtëpi pushimi dhe objekte të tjera në pronën e ndërmarrjes t’i lironin ato brenda afatit të përcaktuar.

/Kosovapress/