Kuvendi i Kosovës ka miratuar në leximin e dytë Projektligjin për masat e përkohshme të produkteve themelore në raste të veçanta të destabilizimit në treg. Ky projektligj është miratuar me 63 vota për, asnjë kundër dhe asnjë abstenim, teksa janë votuar edhe 25 amendamente veç e veç të komisionit funksional. Partitë opozitare nuk e kanë përkrahur këtë projektligj, ku kanë thënë se “ka hapësirë për arbitraritet” dhe se është “i imponuar dhe ndikuar edhe nga interesat tjera private personale partiake”, raporton KosovaPress.

Ministrja e Industrisë, Ndërmarrësisë dhe Tregtisë, Mimoza Kusari-Lila e arsyetoi këtë projektligj duke thënë se synon mbrojtjen e kategorive të lëndueshme në raport me ndryshimet e çmimeve.

“Ky projektligj është i paraparë të aktivizohet  vetëm në situatat e destabiliizmit të tregut dhe vetëm për 14 produkte që janë të specifikuara në këtë projektligj produkte të shportës bazë të cilat synim e kanë mbrojtjen e  kategoritë më të lëndueshme në raport të ndryshimit të çmimeve nuk është projektligj që i hynë listës së përgjithshme të produkteve në markete dhe i përcakton çmimet....Pavarësia e bordit rrjedhimisht kompetencat e shtetit gjatë gjithë diskutimit edhe sot po kenë kontradiktë me atë a po e doni bordin e varur apo të pavarur a është kompetencë e qeverisë apo jo. ...pse në këtë situatë thuani ju e keni shumicën ju e zgjidhni bordin vetë po natyrisht sikurse me të gjitha ligjet tjera kjo buron nga një proces tjetër demokratike që janë zgjedhjet po flasim për formën e diskutimit dhe trajtimit të një teme e cila më së paku meriton të politizohet...Asnjë prej argumenteve ose brengave që po synohen të politizohen nuk kanë të bëjnë me draftimin e këtij ligji”, tha ajo.

Më pas i ka reaguar deputetja e Lidhjes Demokratike të Kosovës, Hykmete Bajrami, e cila tha se projektligji është “farsë politike”.

“Ngritja e çmimeve ministre është alarmante, inflacioni i marsit nuk ka qenë i ndikuar aq shumë prej ngritjes së çmimit të naftës, ne kemi me pa në prill që çmimet kanë me qenë më të larta. Ne krejt frikën e kemi që ligji, bordi dhe gjithçka është një farsë politike sepse nuk keni me pas mundësi me ndikuar’’, ka thënë ajo.

Paraprakisht, deputetja e Lëvizjes Vetëvendosje, Rozeta Hajdari ka paraqitur rekomandimin e Komisionit për Ekonomi, ku kërkoi që të miratohet ky projektligj.

“Ky projektligj ka të bëjë vetëm me rregullimin e çmimeve në rast të destabilizimit në treg. Dhe asnjëherë në situata që janë të paraqitura si situata të jashtëzakonshme, apo gjendje emergjente, por vetëm kur kemi destabilizim në treg. Është i krijuar një bord i pavarur, i përkohshëm, i cili do të punojë sipas Ligjit për Kompensime, dhe për më shumë ky projektligj është shumë afër në bashkëpunim me autoritetet që mund të paraqesin propozime për rregullimin e çmimeve, siç janë Shoqata për Mbrojtjen e Konsumatorëve dhe Autoriteti i Konkurrencës dhe institucione të tjera. Pra, është një bord i pavarur i cili është krijuar sipas rekomandimeve të gjykatës dhe për më shumë është një ligj që mbron qytetarin, mbron konsumatorin dhe po ashtu stabilizon tregun sidomos në rastet kur kemi destabilizim për shkak të manipulimeve në treg”, ka thënë ajo.

Deputeti i Partisë Demokratike të Kosovës, Arben Mustafa deklaroi se deputetët e kësaj partie nuk do të marrin pjesë në votim për Projektligjin për Masat e Përkohshme të Produkteve Themelore në Raste të Veçanta të Destabilizimit në Treg.Sipas tij, ky projektligj lë hapësirë për arbitraritet.

“Ne nuk jemi kundër një ligji që pengon apo ndalon abuzimin në treg përkundrazi kemi thënë se duhet institucionet përgjegjëse të luftojnë çdo formë të abuzimit mirëpo mënyra se si është formuluar ky ligj lë shumë paqartësi dhe lë shumë hapësirë për arbitraritet. Është e paqartë se në cilat raste do të intervenohet në treg për të kufizuar  marzhat e profitit apo të përcaktuar çmimet maksimale...Nuk mund t’i lëmë një trupi që në mënyrë arbitraritet të përcaktoj se çka paraqet çmimit të paarsyeshme apo rritja të paarsyeshme të çmimit  por duhet të definohet qartë me një metodologji të përshirë në projektligj se si do të përcaktohet arsyeshmëria e çmimeve e paraparë në këtë ligj. Ky ligj parasheh bord që nuk mund të jetë bord i pavarur duke qenë se parashihet të  përzgjidhet nga qeveria dhe vetëm të miratohet në Kuvend. Po i lihet një bordi jo të pavarur për të intervenuar në tregun e lirë dhe për të interferuar në funksionimin”, theksoi ai.

Votë për këtë projektligj nuk patën as deputetët e Lidhjes Demokratike të Kosovës. Deputetja, Janina Ymeri tha se ligji për çmimet tavan është i imponuar dhe ndikuar nga interesat partiake e personale.

“Ligji për çmimet tavan i lë pavarësi bordit ashtu që nuk konsiderohet as edhe qëndrueshmëria ekonomike apo marzha pasi siç është parë nga opinonin i Gjykatës  Kushtetuese nuk ka pas siguri juridike për tregti të brendshme në fund fare për shkak se ky ligj i imponuar dhe ndikuar edhe nga interesat tjera private personale partiake  dhe rrezikohet të jetë plotësisht i kapur dhe edhe i ndikuar nga partia në pushtet pa kontrollim efektiv në institucionet tjera shtetërore si i tillë ndikon edhe në mos furnizim dhe furnizim jo adekuat siç po ndodh në barna  dhe ndikon në stabilitet ekonomik ne nuk e përkrahim ligjin për çmimet tavan”,  tha ajo.

Edhe shefi i Grupit Parlamentar të Aleancës për Ardhmërinë e Kosovës (AAK) ka thënë se nuk e përkrahin këtë projektligj për çmimet tavan.

“Aleanca për Ardhmërinë e Kosovës nuk e mbështet këtë ligj i kemi dhënë arsyet. Është e rëndësishme me i cek edhe një herë shkurt. E para, në qoftë se me të vërtetë kjo qeveri kishte pasur vullnet për të intervenuar në treg në situata të jashtëzakonshme, kur është destabilizuar tregu, mënyra më e lehtë dhe më e mirë ka qenë me i marrë dy vendime, veprime të thjeshta që me ul akcizën, tjetra me ul TVSh-në, rrjedhimisht këto dy veprime të qeverisë zingjirore do të kishin ndikuar në uljen e çmimeve në një situatë kur tregu ka qenë i destabilizuar, i imponuar prej një krize globale dhe duke pasur parasysh që secili shtet në Evropë, shumica e shteteve, kanë marrë masa të cilat kanë qenë masa në një situatë të jashtëzakonshme në një treg të destabilizuar”, u shpreh ai.

/Kosovapress/