Portugezi Rafael Leao po kalon një periudhë të vështirë te Milani, ndërsa raportimet nga Italia bëjnë të ditur se klubi kuqezi ua ka ofruar sulmuesin disa prej gjigantëve evropianë, por pa sukses.

Sipas raportimeve të publikuara nga Football Italia, klubet si Arsenal, Manchester United dhe Barcelona nuk janë të gatshme të investojnë shumën e kërkuar për 26-vjeçarin, edhe pse Milan thuhet se ka ulur ndjeshëm pritjet financiare për kartonin e tij.

Leao, i cili dikur konsiderohej ndër lojtarët më të kërkuar në Evropë, po përballet me kritika të shumta këtë sezon për shkak të formës jo stabile dhe mungesës së vazhdimësisë. Raportet në Itali tregojnë se tifozët e Milanit e kanë vërshëllyer disa herë gjatë muajve të fundit, ndërsa drejtuesit e klubit po shqyrtojnë seriozisht shitjen e tij gjatë afatit veror.

Megjithatë, e ardhmja e sulmuesit portugez mbetet e hapur, pasi një paraqitje e mirë me Portugalinë në garat ndërkombëtare mund të rikthejë interesimin e klubeve të mëdha evropiane.

KosovaPress