Dogana e Kosovës ka njoftuar se ka tejkaluar shifrën prej 1 miliard euro të hyra të inkasuara, duke arritur në gjithsej 1 miliard e 7 milionë euro, që paraqet një rritje prej 5.5 për qind krahasuar me të njëjtën periudhë të vitit të kaluar.

Sipas Doganës, në të njëjtën periudhë të vitit 2025 ishin inkasuar rreth 955 milionë euro, ndërsa rritja e këtij viti i atribuohet performancës së qëndrueshme ekonomike, bashkëpunimit të ngushtë me sektorin privat, përmbushjes së detyrimeve ligjore nga komuniteti i biznesit, si dhe rritjes së efikasitetit në luftimin e ekonomisë joformale dhe lehtësimit të procedurave tregtare.

Dogana thekson se një nga zhvillimet më të rëndësishme gjatë këtij viti është zbatimi i sistemit të deklarimit para arritjes së mallrave, i mundësuar pas shtetëzimit të plotë të terminaleve doganore dhe heqjes së pagesave për shfrytëzimin e tyre.

Sipas institucionit, rezultatet e para të këtij sistemi janë vlerësuar si shumë pozitive dhe janë mirëpritur nga komuniteti i biznesit, duke kontribuar në përshpejtimin e procedurave doganore dhe lehtësimin e tregtisë.

Dogana e Kosovës ka bërë të ditur se do të vazhdojë angazhimin për avancimin e kapaciteteve operative dhe përmirësimin e mëtejmë të shërbimeve në funksion të mbledhjes së të hyrave dhe zhvillimit të tregtisë.

/Kosovapress/