Kosova shënon sot Ditën Memoriale për të Mbijetuarit e Dhunës Seksuale të Luftës në Kosovë. Deputetët e Kuvendit të Kosovës do të mblidhen sot në një seancë solemne për shënimin e Ditës Memoriale për të Mbijetuarit e Dhunës Seksuale të Luftës “Ma kthe dritën”.

Seanca nis në orën 17:00.

Kurse, në orën 08:30, ushtruesja e detyrës së presidentes, njëherit kryetarja e Kuvendit të Republikës së Kosovës, Albulena Haxhiu, bën nderime te Memoriali “Heroinat”, për nder të 14 prillit, Ditës të të Mbijetuarve të Dhunës Seksuale në luftën e fundit në Kosovë.

Ndërsa, Qendra Kosovare për Rehabilitimin e të Mbijetuarve të Torturës duke nis nga ora 9.30, mban konferencën rajonale “Avancimi i qasjes në drejtësi për të mbijetuarit e dhunës seksuale të luftës: Përgjegjësia penale dhe e drejta për kompensim”, ku pritet të marrin pjesë u.d e presidentes, Albulena Haxhiu dhe ministrja e Drejtësisë, Donika Gërvalla.

Përndryshe, më 14 prill, shënohet Dita Memoriale e të Mbijetuarve të Dhunës Seksuale gjatë luftës në Kosovë.

Përmes kësaj dite, përkujtohen vuajtjet dhe traumat e atyre që kanë përjetuar dhunë seksuale.

Kjo ditë synon të njohë padrejtësinë e përjetuar dhe traumën si pasojë e krimeve të tilla dhe njëkohësisht të rrisë ndërgjegjësimin për drejtësinë e vonuar dhe luftën kundër stigmës.

/Kosovapress/