Kapiteni i Interit, Lautaro Martinez, ka pranuar se kishte menduar largimin nga klubi pas eliminimit në Kupën e Botës për Klube në vitin 2025, duke zbuluar gjithashtu se pas përfundimit të karrierës dëshiron të largohet plotësisht nga bota e futbollit.

Në një intervistë për “Gazzetta dello Sport”, sulmuesi argjentinas tha se periudha pas dështimit në Botërorin e Klubeve ishte shumë e vështirë emocionalisht për të.

“Kam menduar shumë gjëra dhe kam vuajtur shumë. Nuk po them se kërkova largimin, por nëse do të vinte një ofertë e rëndësishme, ndoshta… isha i shkatërruar”, deklaroi Lautaro.

Ai foli edhe për vështirësitë mentale që ka kaluar gjatë viteve të fundit, duke treguar se punon me psikolog prej kohësh.

“Ndonjëherë dyshoja në vetvete, nëse isha ende i aftë të luaja futboll dhe nëse e meritoja fanellën me numrin 10 te Interi”, u shpreh argjentinasi.

Pavarësisht dyshimeve të së kaluarës, Lautaro theksoi se dëshiron të qëndrojë te Interi deri në fund të karrierës.

“Familja ime është e lumtur këtu. Fëmijët shkojnë në shkollë dhe kanë miqtë e tyre. Është e vështirë ta shoh veten diku tjetër. Nëse nuk më largojnë, do të qëndroj këtu”, deklaroi ai.

Sulmuesi 28-vjeçar shtoi se pas pensionimit nuk planifikon të mbetet pjesë e futbollit.

“Do të zhdukem. Futbolli është një ambient që nuk më pëlqen. Nuk do të dëgjoni më për mua”, theksoi Lautaro.

KosovaPress