Drejtori i Drejtorisë së Kadastrit në Kryeqytet, Gent Begolli, i është drejtuar zyrtarisht Agjencisë Kadastrale të Kosovës me kërkesë për ndërmarrjen e masave urgjente që do të mundësonin përshpejtimin e trajtimit të lëndëve pronësore gjatë periudhës verore.

Në kërkesën e adresuar përmes postës elektronike zyrtare, është ngritur shqetësimi për vonesat që po shkaktohen në procedimin e lëndëve për shkak të ngarkesës së sistemit. Një nga arsyet kryesore të këtyre vonesave lidhet me faktin se lëndët që kthehen për plotësim te noterët rikthehen sërish në radhën e pritjes sipas datës fillestare të aplikimit, duke krijuar bllokime në proces dhe duke ndikuar në zgjatjen e afateve të trajtimit për lëndët e tjera.

“Për të lehtësuar këtë situatë, është kërkuar që për periudhën 1 qershor – 1 shtator të mundësohet përkohësisht lirimi i radhitjes automatike të lëndëve, me qëllim të përshpejtimit të përpunimit të rasteve në procedurë dhe zvogëlimit të kohës së pritjes për qytetarët.

Kjo kërkesë merr rëndësi të veçantë gjatë muajve të verës, kur një numër i madh i bashkatdhetarëve qëndrojnë përkohësisht në Kosovë dhe kanë nevojë të përfundojnë procedurat pronësore brenda afateve të arsyeshme.

Po ashtu, Drejtoria e Kadastrit ka kërkuar edhe përmirësime teknike në sistem, në mënyrë që zyrtarët të njoftohen menjëherë pas plotësimit të komenteve nga noterët, si dhe të shmanget trajtimi paralel i së njëjtës lëndë nga më shumë se një zyrtar në të njëjtën kohë.

Kryeqyteti mbetet i përkushtuar në përmirësimin e vazhdueshëm të shërbimeve administrative dhe në mbështetjen e çdo iniciative që kontribuon në rritjen e efikasitetit, transparencës dhe cilësisë së shërbimeve për qytetarët”, thuhet në njoftimin e Komunës së Prishtinës.

/Kosovapress/