Gazetari i njohur i transferimeve, Fabrizio Romano, ka konfirmuar se ish-reprezentuesi i Gjermanisë, Sami Khedira, do të rikthehet te Real Madridi për t'u bërë pjesë e stafit teknik të trajnerit José Mourinho.

Khedira do të nisë punën e tij të re në korrik të vitit 2026, duke marrë kështu rolin e tij të parë zyrtar në stafin teknik të një skuadre seniore.

Khedira, i cili luajti për pesë vite në "Bernabéu" (2010–2015) dhe ishte një nga blerjet e para të Mourinhos në epokën e tij të parë, u përzgjodh nga tekniku portugez para ish-shokut të tij të skuadrës, Pepe, i cili gjithashtu u konsiderua seriozisht për këtë post.

Sipas Romanos, roli i Khedirës si ndihmës-trajner do të shtrihet përtej pjesës taktike; ai do të shërbejë si një urë lidhëse mes zhveshtores, stafit teknik dhe hierarkisë së klubit, duke përdorur profilin e tij shumëgjuhësh dhe përvojën si kampion bote.

Mediat spanjolle si Marca e krahasojnë këtë lëvizje me rolin që Aitor Karanka kishte gjatë periudhës së parë të Mourinhos në Madrid – një ish-lojtar i besuar që njeh peshën institucionale të klubit.

Përveç Khedirës, stafi i ri i Mourinhos te Real Madridi do të përbëhet edhe nga ndihmësit João Tralhão dhe Pedro Machado, trajneri i fitnessit António Dias, analisti i performancës Roberto Merella dhe trajneri i portierëve Nuno Santos.

Khedira do të paraqitet në klub në fillim të korrikut për fazën para-sezonale, kur edhe nis zyrtarisht cikli i dytë i Mourinhos në krye të "Los Blancos".

KosovaPress