Policia e Kosovës ka intervistuar pronarin e një lokali në Han të Elezit, pasi dyshohet se disa persona janë helmuar pas konsumimit të ushqimit në biznesin e tij.

Sipas policisë, rasti lidhet me një ngjarje të 13 korrikut, ndërsa pronari është intervistuar më 15 korrik në cilësinë e të dyshuarit.

Me autorizim të prokurorit është iniciuar rasti për veprën penale "Prodhimi dhe vënia në qarkullim e artikujve të dëmshëm ushqimorë", ndërsa hetimet janë në vazhdim.

Rreth 80 persona dyshohet se janë helmuar nga konsumimi i ushqimit fast-food në Han të Elezit.

Ushqimet nga të cilat dyshohet se janë helmuar janë picat dhe sendviqët.

Të mërkurën, zëdhënësi i Policisë së Kosovës për rajonin e Ferizajt, Kanun Veseli ka bërë të ditur për KosovaPress, se nga 13 korriku deri më 15, janë trajtuar rreth 80 persona me simptoma të diarresë dhe vjelljes.

/Kosovapress/