Hamza: PDK-ja do të qëndrojë në opozitë, i urojmë suksese Kurtit me partitë të tjera të formojnë institucionet
Lajme
Lexohet për: 3 min.
Dëgjoje me zë...
Hamza: PDK-ja do të qëndrojë në opozitë, i urojmë suksese Kurtit me partitë të tjera të formojnë institucionet
10/07/2026 - 11:06
Linku u kopjua
Partia Demokratike e Kosovës do të qëndrojë në opozitë, tha kryetari i kësaj partie, Bedri Hamza, pas takimit me liderin e Lëvizjes Vetëvendosje, Albin Kurti.
Ai tha se bisedat me Kurtin ishin korrekte, por i uroi atij suksese për formimin e institucioneve të reja, përfshirë presidentin.
“Bazuar në bisedat që kemi pasur dhe diskutimet, normalisht korrekte, qëndrimi ynë është se PDK-ja për këtë mandat është parti në opozitë. Ne i dëshirojmë sukses zotëri Kurti dhe të gjithë atyre që takohen, bisedojnë që t’i japin vendit institucione, duke përfshirë të gjitha institucionet. Përveç PDK-së, në Kuvendin e Kosovës janë edhe 98 deputetë të tjerë dhe matematikisht mundet me u bërë kompletimi i të gjitha institucioneve. Ne do të bashkëpunojmë me të gjitha forcat politike brenda Kuvendit në dobi dhe interes të qytetarëve të Kosovës dhe për të gjitha ato çështje ku është interesi i Kosovës, PDK-ja ka dëshmu dhe kemi premtu se vota e PDK-së do të jetë votë pro, duke përfshirë marrëveshje financiare dhe marrëveshje të tjera që përfshijnë dy të tretat e votave”, tha ai.
I pyetur se si do të veprojnë në zgjedhjen e presidentit, Hamza tha se përgjegjësia kryesore për formimin e institucioneve i takon LVV-së si partia me numrin më të madh të ulëseve në Kuvend.
“Qëndrimi ynë është se PDK-ja do të ketë rolin e vet konstruktiv në interes të vendit si parti opozitare brenda Kuvendit. Nuk jemi na pala që na bëhen kërkesat, pasi përgjegjësinë për krijimin e institucioneve e ka LVV si partia më e madhe me ulëse në Kuvend. Të gjitha partitë e tjera politike nuk munden me zgjedh presidentin pa LVV-në. LVV-ja duhet me gjetë partner sipas nevojave dhe kritereve të tyre për me i dhënë vendit institucione”, shtoi Hamza.
Kryeministri në detyrë, Albin Kurti, të premten ka ftuar në takim edhe kryetarin e LDK-së, Lumir Abdixhiku, dhe kryetarin e Aleancës, Ardian Gjini. Ky i fundit ka refuzuar takimin, derisa ka përmendur disa prej kërkesave të tij, përfshirë gazin amerikan për ta bërë kuorumin për presidentin.
KQZ certifikoi rezultatet e zgjedhjeve të 7 qershorit të mërkurën. Nga këto zgjedhje, parti e parë ka dalë Lëvizja Vetëvendosje me 47.13%, apo 53 ulëse në Kuvend. E dyta, Partia Demokratike e Kosovës, me 19.44%, apo 22 deputetë. Ndërkaq, Lidhja Demokratike e Kosovës, me 16.69%, ka fituar 18 ulëse, si dhe Aleanca, me 6.74%, shtatë ulëse. Kurse komunitetet joshumicë kanë siguruar 20 ulëse./KosovaPress/
