Ministri në detyrë i Punëve të Jashtme, Glauk Konjufca, ka reaguar ndaj raportimeve se gjatë një takimi me qytetarë, ‘ka ironizuar me ish-presidenten e vendit Vjosa Osmani”.

“Qyre, kur jena te frizerkat”, thotë Konjufca, dhe fillon të qesh, si dhe shkakton të qershura edhe tek të pranishmit tjerë. Kjo video e Konjufces qarkulloi në rrjete sociale.

Përmes një reagimi publik, Konjufca tha se mënyra e interpretimit të deklaratës e kanë detyruar të reagojë.

Ai sqaroi se gjatë tubimit ishte ndërprerë nga një “pseudogazetar”, i cili kishte përdorur termin “frizere”, term që, sipas Konjufcës, u përdor në mënyrë përçmuese.

“Asnjë diskutim imi nuk ka pasur të bëjë me Presidenten Osmani. Mediat qëllimkëqija, për kushedi çfarë kalkulimesh, e prenë vetëm termin ‘frizere’ dhe më pas ndërtuan rrëfimin e tyre të paqenë. Të gjithë ata që më njohin, e edhe vetë znj. Osmani, me të cilën kam bashkëpunim të gjatë dhe respekt të ndërsjellë, të cilin e ruaj edhe sot, e dinë qasjen time në politikë. Për çdo rast, të gjithë atyre që ky konstrukt i inxhinieruar i luftës speciale i ka lënduar, u kërkoj ndjesë”, shkruan Konjufca.

Konjufca theksoi se diskutimi i tij kishte vetëm një qëllim – të kundërshtonte përdorimin nënçmues të këtij profesioni – dhe jo të lidhej me Presidenten Osmani.

“Asnjë diskutim imi nuk ka pasur të bëjë me Presidenten Osmani. Mediat qëllimkëqija e prenë vetëm termin ‘frizere’ dhe më pas ndërtuan rrëfimin e tyre të paqenë”, tha ai.

Ai shtoi se me presidenten ka bashkëpunim të gjatë dhe respekt të ndërsjellë, duke theksuar se kjo qasje vazhdon edhe sot.

Ndaj asaj videoje të Konjufcës ka reaguar ish-deputeti i LDK-së, Ermal Sadiku.

“Shikoni kë kanë dasht me bo president. Një njeri të dobët. Një njeri që mendon se votat i japin të drejtë me ofendu një nanë, një grua, një profesion. Frizere është profesion. Është punë. Djersë. Dinjitet. Nuk ka asgjë të turpshme me punu ndershëm. Po ju normal që e ofendoni punën, sepse kurrë s’e keni kuptu çka domethanë me punu vërtet në jetë”, shkruan ai dhe shpërndan videon e Konjufcës.

/Kosovapress/