Mesfushori danez, Christian Eriksen, ka thyer heshtjen përmes një mesazhi publik duke njoftuar se ndodhet në shtëpi dhe se gjendja e tij shëndetësore është e stabilizuar.

Ky reagim vjen pasi futbollisti pësoi një goditje nga aparati ICD (defibrilatori kardioverter i implantueshëm) që ka të vendosur në trup.

"Siç mund ta imagjinoni, marrja e një goditjeje nga ICD-ja ime ka pasur ndikim të madh tek unë dhe familja ime, por dua t’ju siguroj se kjo ishte një situatë ndryshe nga ajo që ndodhi në vitin 2021," u shpreh Eriksen, duke bërë dallimin nga rasti i rëndë që pësoi vite më parë në Kampionatin Evropian.

Eriksen shprehu mirënjohje të thellë për ndërhyrjen e shpejtë të stafit mjekësor dhe lojtarëve në fushë, si dhe për mjekët që janë kujdesur për shëndetin e tij ndër vite.

"Për momentin, fokusi im është te rikuperimi, kalimi i kohës me familjen, pushimet dhe të luaj futboll me fëmijët e mi," përfundoi ai.

Për sa i përket të ardhmes së afërt, danezi njoftoi se tashmë ka nisur rikuperimin dhe se fokusi i tij kryesor do të jetë pushimi dhe koha e kaluar me njerëzit e dashur.

KosovaPress