Trajneri Luis Enrique ka deklaruar se skuadra e tij Paris Saint-Germain duhet të shënojë sërish disa gola në ndeshjen e kthimit ndaj Bayern Munich për të siguruar kualifikimin në finalen e Ligës së Kampionëve, pas fitores spektakolare 5:4 në takimin e parë gjysmëfinal. Ai theksoi se ekipi duhet të ruajë të njëjtin mentalitet edhe në sfidën që zhvillohet në Mynih.

PSG arriti një fitore dramatike në Paris në një ndeshje me ritëm të lartë dhe shumë gola, që u cilësua si një nga gjysmëfinalet më spektakolare në historinë moderne të kompeticionit. Enrique u shpreh se intensiteti i lojës ishte i jashtëzakonshëm dhe, pavarësisht fitores, skuadra e tij mund të kishte marrë një rezultat edhe më të thellë kur ishte në epërsi 5:2.

"Sapo e pyeta stafin tim se sa gola mendonin se do të na duheshin javën tjetër dhe të gjithë mendojmë se do të na duhet të shënojmë të paktën tre ", tha spanjolli, i cili ishte organizatori i triumfit 5-0 të PSG -së ndaj Interit në finalen e sezonit të kaluar.

Në këtë përballje plot kthesa, golat nga Khvicha Kvaratskhelia dhe Ousmane Dembele ndihmuan PSG-në të krijojë epërsi, ndërsa bavarezët reaguan duke mbajtur të hapur çështjen e kualifikimit për ndeshjen e kthimit. Trajneri i Bayernit, Vincent Kompany, vlerësoi reagimin e skuadrës së tij dhe theksoi se atmosfera në stadiumin vendas mund të jetë vendimtare.

Ndeshja e kthimit pritet të zhvillohet në Mynih, ku Bayerni do të kërkojë përmbysjen për të siguruar një vend në finale, ndërsa PSG synon të mbrojë avantazhin minimal dhe të arrijë një tjetër sukses historik në garën më të madhe evropiane për klube.

KosovaPress