Klubi futbollistik, Drita, ka prezantuar zyrtarisht futbollistin Agan Mjaki si përforcimin më të ri të skuadrës për sezonin aktual.

23-vjeçari nga Shkupi i bashkohet ekipit bardhekaltër nga radhët e Laçit, duke sjellë me vete përvojë ndërkombëtare dhe zhvillim në akademi të njohura evropiane.

Mjaki ka qenë pjesë e përfaqësueseve të moshave të Maqedonisë së Veriut dhe Shqipërisë, ndërsa formimi i tij si futbollist është bërë në Holandë, ku ka luajtur me grupmoshat e klubeve si Tëente dhe Groningen.

Trajneri i Dritës, Zekirja Ramadani, pritet ta ketë në dispozicion lojtarin e ri për sfidat e ardhshme, me synimin për të forcuar repartin e skuadrës.

“Mirë se erdhe në familjen bardhekaltër, Agan Mjaki”, thuhet në njoftimin e klubit, ku i është uruar mirëseardhje dhe suksese me fanellën e Dritës.

Me këtë transferim, Drita vazhdon përforcimin e skuadrës në prag të sezonit të ri, duke synuar të mbetet konkurruese në garat vendore dhe ndërkombëtare.

KosovaPress