Trajneri i Spanjës, Luis de la Fuente, e ka vlerësuar paraqitjen e Lamine Yamal në fitoren 1-0 ndaj Portugalisë si një nga performancat më të rëndësishme në karrierën e talentit 18-vjeçar, pasi kampionët e Evropës siguruan kualifikimin në çerekfinalet e Kupës së Botës.

Spanja siguroi fitoren në minutat shtesë të ndeshjes së zhvilluar në Arlington, kur zëvendësuesi Mikel Merino realizoi golin vendimtar në minutën e 91-të, duke e dërguar kombëtaren spanjolle mes tetë skuadrave më të mira të turneut për herë të parë që nga triumfi në Kupën e Botës të vitit 2010.

Pas ndeshjes, përzgjedhësi Luis de la Fuente vlerësoi lart kontributin e Lamine Yamal, duke theksuar se ndikimi i tij shkoi përtej statistikave.

“Për mua, Lamine ka luajtur një nga ndeshjet më të rëndësishme të jetës së tij. Përtej faktit nëse ishte i shkëlqyer apo jo, për mua ka qenë një nga ndeshjet që do ta ndihmojë më shumë të rritet”, tha de la Fuente.

Yamal mbërriti në Kupën e Botës duke u rikuperuar nga një dëmtim në kofshë, çka bëri që ndeshjen hapëse ndaj Kepit të Gjelbër ta niste nga stoli, në sfidën që përfundoi pa gola.

Megjithatë, ai u rikthye në formacionin titullar dhe shënoi në fitoren bindëse 4-0 ndaj Arabisë Saudite.

Në përballjen ndaj Portugalisë, sulmuesi i Barcelonës regjistroi tri tentativa për gol, dy prej tyre në kuadrat, duke qenë vazhdimisht rrezik për mbrojtjen kundërshtare dhe duke ndihmuar Spanjën të mbajë presionin deri te goli i fitores.

De la Fuente la të kuptohet se përpjekjet e vazhdueshme për ta ndalur Yamal mund të kenë ndikuar edhe në dëmtimin e mbrojtësit portugez Nuno Mendes, i cili u largua nga loja në minutën e 56-të dhe u zëvendësua nga Nelson Semedo.

“Lamine bëri një punë spektakolare. Ai vuajti për ekipin, ai mbrojti për ekipin. Kur e kishte topin, ai gjithmonë krijonte dyshime dhe pasiguri për kundërshtarin. Ai gjeneronte shumë frikë”, deklaroi trajneri spanjoll.

Ai shtoi se pret që 18-vjeçari të vazhdojë të jetë një nga lojtarët kyç të skuadrës në fazën e mbetur të turneut.

“Ne ende kemi nevojë për Lamine në këtë Kupë Bote, për të vazhduar rritjen dhe për të ofruar këto lloj performancash”, theksoi de la Fuente.

I pyetur për kundërshtarin e mundshëm, de la Fuente tha se fokusi i tij mbetet te skuadra e Spanjës.

“Çdo kundërshtar me të cilin përballeni në këtë fazë do të ketë bërë mjaftueshëm për të merituar të jetë atje, dhe kushdo që vjen më pas do të jetë një sfidë edhe më e madhe se ata që kemi hasur deri më tani”, përfundoi ai.

Në çerekfinale, Spanja do të përballet me Belgjikën.

KosovaPress