Tensionet rreth finales së Kupës së Kosovës mes Ferizajit dhe Dukagjinit nuk ishin të papritura, pasi pakënaqësitë e klubit ferizajas ndaj referit kishin filluar të artikuloheshin publikisht edhe para ndeshjes. Kritikat për vendimet e gjyqtarit dhe dyshimet për ndikime në rezultatet e fundit kishin ngritur tashmë një klimë mosbesimi, e cila kulmoi në përballjen vendimtare.

Kjo ishte deklarata e presidentit të Ferizajit, Lulzim Abazi, dhënë për KosovaPress një ditë para finales ndaj Dukagjinit një paralajmërim i drejtpërdrejtë për atë që klubi e konsideronte si padrejtësi në referim nga gjyqtari Burim Jahmurataj.

“Kjo domethënë vetvetiu që rezultatet që ndodhen, sidomos në këto xhiro të fundit, domethënë ishin rezultate që nuk mund të ndodhnin po të ishte çdo gjë në rregull dhe, sigurisht, siç po duket, aleancat e vjetra, ato që janë që i kanë ekipet apo klubet në mes veti, edhe na jemi dëmtu seriozisht. Kjo pjesa e poshtme e tabelës, jemi dëmtu shumë seriozisht për shkak të rezultateve që ndodhen në kohën e fundit. Ju e dini që dy javë më herët, në Gjilan, një refer ne na ka ndëshku me 13 kartona; e kemi bërë publike këtë dhe nuk ka mundësi 13 kartona gjatë një ndeshje me i dhënë një refer, i ka thyer të gjitha rekordet e Republikës së Kosovës. Që kur është formuar futbolli i Kosovës, i ka thyer të gjitha rekordet ky refer dhe është shumë për çudi që të njëjtin refer do ta kemi në VAR në finalen e madhe të Kupës së Kosovës. Kjo është absurd i llojit të vet, mirëpo kjo është në Kosovë, kjo po ndodh, ne nuk kemi çfarë të bëjmë.” – tha presidenti Abazi.

Ngjarjet në finalen e mbrëmshme duket se vetëm sa i kanë përforcuar këto pretendime. Skuadra e Ferizajit reagoi ashpër pas ndeshjes, duke drejtuar kritikat kryesisht ndaj gjyqtarit Genc Nuza.

Në një postim në faqen zyrtare, klubi ferizajas shkroi: “Genc Nuza, urime Kupa e Kosovës. Turpi ndryshe nuk është! Ne medalje nuk marrim”.

Tensionet kulmuan në minutat e fundit, kur Ferizaj për disa minuta e braktisi fushën, i pakënaqur me vendimet e gjyqtarit dhe kohën shtesë të akorduar. Sipas raportimeve, fillimisht u dhanë katër minuta shtesë, çka shkaktoi reagim të menjëhershëm nga lojtarët e Ferizajt, të cilët pretendonin për më shumë ndërprerje gjatë lojës.

Situata u përkeqësua edhe më tej pas një rasti të diskutueshëm në zonë, ku Ferizaj kërkoi penallti, por gjyqtari nuk e akordoi dhe nuk e rishikoi rastin në VAR.Në vazhdim, kapiteni i Ferizajit, Haxhimusa, u ndëshkua me kartonin e dytë të verdhë dhe u përjashtua, duke çuar në eskalimin e plotë të situatës.

Pas rreth 10 minutash ndërprerje, Ferizaj u rikthye në fushë për ta përfunduar ndeshjen, por reagimi pas saj tregon se pakënaqësia ndaj referit mbetet e thellë. Ende nuk ka një sqarim të detajuar për vendimin e klubit që të mos i pranojë medaljet, ndërsa priten reagimet e institucioneve përkatëse lidhur me incidentet në finale.

Në finalen e zhvilluar në stadiumin “Fadil Vokrri”, në Prishtinë, Dukagjini e ka fituar Kupën e Kosovës për herë të parë, me rezultatin 2-1.

KosovaPress