Lidhja Demokratike e Kosovës insiston se njehsorët elektrikë nuk masin kohën mirë për tarifën e ulët gjatë natës.

Anëtar i Kryesisë së LDK-së, Visar Azemi tha se KEDS-i mbajti një konferencë për medie gjatë ditës, por sipas tij nuk dha përgjigje konkrete dhe nuk sqaroi problemin siç pritej. Ai thotë se kompania në fjalë po manipulon opinionin publik, duke i quajtur problemet me njehsorët vetëm “devijime të vogla teknike” dhe raste të izoluara, raporton KosovaPress.

Azemi akuzon KEDS-in për manipulim dhe thotë se qytetarët në Kosovës janë dëmtuar financiarisht, ndërsa kritikon edhe Ministrinë e Industrisë dhe Tregtisë për mosveprim pavarësisht ankesave të shumta.

“KEDS-i doli në konferencën e tyre të shumëpritur por nuk thanë asgjë. Nuk thanë asgjë nga ajo çfarë kishin thënë edhe në reagimin e parë, përpos një manipulimi tjetër me opinionin publik ku në fakt e pranojnë se ka pasur devijime me njehsorët elektrikë, por mundohen që këto devijime t'i quajnë devijime teknike të vogla, raste të izoluara. Qysh edhe ju kam informuar gjatë tërë kohës, masat tona kanë treguar të kundërtën. Unë i kam mbledhur në terren 884 masa, nga to 87% tregojnë që koha në njehsor matet gabimisht. Dhe këtu para jush sot e kam edhe një dosje tjetër, e cila është dosja nga qytetarët, mbi 500 kallëzime, verifikime të qytetarëve të Republikës së Kosovës, të cilat tregojnë se njehsorët e tyre po matin gabimisht”, tha Azemi.

Azemi thotë se nuk bëhet fjalë për raste të izoluara apo gabime teknike, por për një skemë të organizuar mashtrimi me njehsorë elektrikë.

“Pra nuk po flasim për rast të izoluar, nuk po flasim për gabim teknik ose lëshim teknik, po flasim për organizim dhe një skemë bukur të madhe të mashtrimit me njehsorë elektrikë që ka penalizuar financiarisht qytetarët e Republikës së Kosovës. Pra KEDS prapë po thotë që orët matin drejt dhe ky blloku me të lirë s'ka lidhje po thonë nëse nuk ja fillon orën 10:00 ose 11:00 mbrëmje, mund t'ia fillojë diku më vonë. Por vendimet e ZRRE-së tregojnë se kur matet me të lirë, kur matet me të shtrenjtë, kur fillon koha me të lirë, kur fillon koha me të shtrenjtë, pra kjo është edhe arsyeja e krejt këtij skandali që e kemi shpalosur”, tha Azemi

Ai shtoi se Ministria e Industrisë dhe Tregtisë ka dalë në terren për të verifikuar problemet me njehsorët elektrikë, por sipas tij, kjo tregon se problemi ka ekzistuar prej kohësh, por institucionet nuk kanë vepruar.

“Në të njëjtën kohë sot kemi mësuar nga Ministria e Industrisë dhe Tregtisë që kanë dalë në terren me stafin e tyre për me i verifikuar gabimet me njehsorë elektrikë. Dhe sot pikërisht e mësuam se ku paska qenë edhe problemi dhe shtylla kryesore ku duhet me u bazuar i gjithë ky skandal. Pra shteti e paska pasur fjalën e vet të cilën nuk e paska ushtruar asnjëherë. Nëse Ministria e Industrisë dhe Tregtisë sot paska dalë me i heqë njehsorët elektrikë, atëherë pyetja e thjeshtë është: ku paskan qenë këta gjithë këto vite që nuk paskan reaguar?Të dy palët, atje edhe KEDS-i edhe Ministria e konfirmojnë që kanë pasur ankesa prej qytetarëve. Pra paska pasur ankesa edhe në KEDS edhe në Ministri të Industrisë dhe Tregtisë, po pse s'paskan reaguar”, tha Azemi

Ai thekson se  Ministria e Industrisë dhe Tregtisë ka pasur përgjegjësi ligjore për mbikëqyrjen e njehsorëve, por nuk e ka bërë punën e vet, nuk është licencuar asnjë laborator i pavarur për verifikim të saktë, gjë që sipas tij, kjo ka lejuar operatorë si KEDS të manipulojnë me matjet.

“Pra Ministria ka rregullore, e ka agjencionin e meteorologjisë i cili është rregullues i këtyre pajisjeve që matin. Pra nuk paskan bërë punën e vet, nuk kanë licencuar asnjë laborator të pavarur për me i bërë këto matje në formë të drejtë dhe të pavarur dhe rrjedhimisht i kanë lejuar operatorët ekonomikë sikurse KEDS-i në këtë rast me manipuluar me njehsorë elektrikë. Pra shteti paska dështuar dhe me vonesë po reagon vetëm kur ka plasur skandali nga ne. Pra nuk pajtohem me qasjen e MINTIT në këtë rast, të Ministrisë dhe të pushtetit, sepse këta po thonë që nga sot do t'i pranojmë edhe ankesat e qytetarëve dhe do ta marrim këtë çështje pak më me seriozitet. Pyetja është: çka do të bëni me rastet të cilat janë manipuluar deri tash, me të gjitha ato kërkesa të qytetarëve që nuk i keni adresuar deri tash”, tha Azemi.

Përveç kësaj, Azemi ka theksuar se organet kompetente duhet të ndërhyjnë menjëherë për të sqaruar përgjegjësitë e KEDS-it dhe të Ministrisë përkatëse, duke paralajmëruar se rasti nuk duhet trajtuar si çështje teknike, por si problem me përmasa të mëdha.

“Ne i thërrasim organet kompetente që t’i hetojnë edhe KEDS-in edhe Ministrinë, sepse këtu kemi të bëjmë me një skandal super serioz dhe super të madh. Pra nuk mundesh as KEDS-i e as Ministria me dalë me i tërheqë këta njehsorë, sepse sot dy palët kanë tërhequr nga shtëpitë dhe banesat tona njehsorë elektrikë, me pretenduar që janë raste të izoluara, pa pasur një hetim të plotë nga organet e hetuesisë. Prandaj unë me të drejtë po e them që në dështimin e shtetit në këtë rast, qytetarët janë penalizuar dhe edhe Ministria edhe KEDS duhet me u hetuar deri në fund. Pra nuk po flasim për toleranca teknike, po flasim për skema të manipulimeve në shkallë të madhe të vendit,” tha Azemi.

Ai ka shtuar se do t’i drejtohet Prokurorisë për të kërkuar zbardhjen e plotë të rastit dhe trajtimin e tij me urgjencë, duke kërkuar edhe kompensimin e qytetarëve të dëmtuar.

“Mu në ditët në vazhdim nuk më mbetet gjë tjetër pos me i u drejtuar Prokurorisë së Shtetit, Prokurorisë Speciale për, do të thotë KEDS-in dhe Ministrinë e Industrisë, në mënyrë që ky rast të gjejë zgjidhje sa më shpejt. Qytetarët e dëmtuar me të drejtë po kërkojnë kompensimin e tyre dhe kjo do të jetë ndoshta edhe kërkesa kryesore e këtij skandali të zbardhur. Pra po e përsëris: ku ishte shteti i cili nuk i mbrojti qytetarët e vet, e la KEDS-in me manipuluar me njehsorë elektrikë dhe reagoi vetëm në momentin kur plasi skandali i tyre nga ne,” tha Azemi.

Sa i përket kësaj çështjeje, Lidhja Demokratike e Kosovës, me datën 27 mars ka dorëzuar ne KEDS  dëshmi me pretendimin njehsorët për matjen e energjisë elektrike faturojnë qytetarët më shtrenjtë dhe kur tarifa është më e lirë. Ndërkaq reagimi i KEDS-it ka qene se matjen janë të sakta, të besueshme dhe transparente.

Lidhur me këto pretendime, MINTI ka themeluar Komision të posaçëm për verifikimin e njehsorëve elektrikë. Derisa sot bëri të ditur se, njehsorët që janë vërejtur se kanë mospërputhje të kohës, janë tërhequr nga funksioni dhe janë sjellë për verifikim në Agjencinë e Metrologjisë së Kosovës.

Sipas MINTI-it, rezultatet e verifikimeve të njehsorëve të parë pritet të dalin së shpejti dhe opinioni publik do të njoftohet me kohë.

/Kosovapress/