Kryetari i Federatës së Futbollit të Kosovës, Agim Ademi ka lavdëruar mesfushorin, Veldin Hoxha, duke e cilësuar si një shembull të rrallë të përkushtimit dhe identitetit në futbollin modern. Edhe pse u rrit dhe u formua si futbollist në Kroacia, ai kurrë nuk i harroi rrënjët e tij nga Kosova.

Në rrugëtimin e tij si futbollist i ri, Hoxha kishte mundësi të përfaqësonte edhe Kroacinë apo Bosnja dhe Hercegovina. Madje, ai ishte edhe kapiten i përfaqësueses së Kroacisë për grupmoshën U21, një arritje që për shumë lojtarë do ta bënte zgjedhjen shumë më të lehtë.

Megjithatë, për Hoxhën futbolli nuk ishte vetëm një karrierë apo mundësi profesionale. Për të ishte edhe identitet dhe përkatësi.

Ademi bënë të ditur  se Hoxha vendosi të refuzojë opsionet e tjera dhe të zgjedhë fanellën e Kosovës, një vendim që nuk matet me kontrata apo statistika, por me ndjenjë dhe krenari kombëtare.

“Ai refuzoi mundësitë tjera dhe vendosi ta veshë fanellën e Kosovës. Një vendim që nuk matet me kontrata apo statistika, por me ndjenjë dhe përkatësi” – deklaroi Agim Ademi.

Historia e Veldinit është një reflektim i përvojës së shumë shqiptarëve që jetojnë jashtë vendit. Edhe pse jetojnë dhe ndërtojnë jetën në shtete të ndryshme të botës, lidhja me Kosovën mbetet e fortë dhe e pathyeshme.

Ndër të tjerash Ademi tregon se rrugëtimi i Veldin Hoxha dërgon një mesazh të qartë,

“Historia e Veldin Hoxhës është edhe një mesazh i fuqishëm për shtetin dhe shoqërinë tonë, na kujton një të vërtetë të thjeshtë: Mund të jetosh në Kroaci, Gjermani apo kudo në botë, por kur rrënjët i ke në Kosovë, zemra gjithmonë të kthen aty”, ka shkruar Ademi në Facebook.

Kosova  ndeshjen e ardhshme do ta zhvillojë kundër Sllovakisë, më 26 mars.

KosovaPress