Shoqata e Botuesve të Kosovës ka nisur numërimin mbrapsht për hapjen e Panairit të 26-të të Librit “Prishtina 2026”, ngjarjes më të madhe të librit në gjuhën shqipe, e cila do të mbahet nga 17 deri më 21 qershor në Prishtinë.

Me moton “Libri hap botën”, edicioni i sivjetmë organizohet nga Shoqata e Botuesve të Kosovës, në bashkëpunim me Ministrinë e Kulturës, Rinisë dhe Sportit, Komunën e Prishtinës dhe Pallatin e Rinisë.

Ceremonia zyrtare e hapjes do të zhvillohet më 17 qershor në orën 12:00.

Gjatë pesë ditëve të panairit, vizitorët do të kenë mundësi ta frekuentojnë atë çdo ditë nga ora 09:00 deri në 21:00, ndërsa mbyllja do të bëhet më 21 qershor në orën 19:00. Hyrja do të jetë pa pagesë për të gjithë vizitorët.

Në këtë edicion do të marrin pjesë mbi 60 botues shqiptarë, të cilët do të prezantojnë rreth 2.000 tituj të rinj dhe afërsisht 6.000 botime të viteve të fundit.

Programi përfshin më shumë se 40 aktivitete kulturore, promovime librash dhe takime me autorë. Mes mysafirëve të veçantë spikat shkrimtari italo-francez Francesco Rapazzini, i cili do të jetë i ftuari i nderit i panairit.

Organizatorët presin që panairi të vizitohet nga rreth 30 mijë persona, përfshirë studentë, nxënës, qytetarë, si dhe personalitete nga jeta akademike, letrare, politike dhe intelektuale e Kosovës.

Përveç promovimit të botimeve të reja, ngjarja do të shërbejë edhe si platformë për shënimin e disa përvjetorëve të rëndësishëm përmes aktiviteteve, debateve dhe përkujtimoreve. Në panair do të marrin pjesë gjithashtu shkrimtarë vendorë e ndërkombëtarë, botues, përkthyes, librarë dhe profesionistë të fushës së librit.

/Kosovapress/