Giovanni Malagò është zgjedhur presidenti i ri i Federatës Italiane të Futbollit (FIGC), duke marrë drejtimin e futbollit italian në një periudhë të vështirë pas dështimit të kombëtares për t’u kualifikuar në Kupën e Botës 2026. Malagò kishte hyrë në garë si një nga favoritët kryesorë, me mbështetjen e disa prej institucioneve më të rëndësishme të futbollit italian.

Ish-presidenti i Komitetit Olimpik Kombëtar Italian (CONI), Giovanni Malagò, do të pasojë Gabriele Gravina, i cili dha dorëheqje në prill pas eliminimit të Italisë nga gara për Botërorin 2026. Dorëheqja e Gravinës erdhi mes presionit të madh publik dhe institucional pas dështimit të tretë radhazi të “Azzurrëve” për të siguruar një vend në Kupën e Botës.

Malagò kishte premtuar reforma të rëndësishme në futbollin italian, me fokus te zhvillimi i lojtarëve të rinj, modernizimi i stadiumeve, qëndrueshmëria financiare e klubeve dhe përmirësimi i strukturave të futbollit. Zgjedhja e tij shihet si fillimi i një epoke të re për FIGC-në, e cila synon rikthimin e Italisë mes fuqive kryesore të futbollit botëror.

KosovaPress